Qeqertalik: Ataatsimiititaliani siulittaasussat toqqarneqartut

Ataatsimiititaliani siulittaasussat toqqarneqareersut, Kommune Qeqertallip borgmesterissaa, Ane Hansen, KNR-imut paasissutissiivoq.

Aqqa Samuelsenip (IA) Meeqqanut, Utoqqarnut, Isumaginninnermut Atuarfeqarnermullu ataatsimiititaliaq "Inuit" siulittaasuuffigilissavaa.

Timooq Mølgaardip (S) Sanaartornermut, Avatangiisinut Suliffeqarnermullu ataatsimiititaliaq "Inoqarfik" siulittaasuuffigilissallugu.

AAMMA ATUARUK Sumiiffinni oqartussaaneq aallukkaat

AAMMA ATUARUK Inoqarfiit aalajangiisussaaqataassapput

Ataatsimiititaliat pingajuat, tassaasoq "Timi Tarnilu" kommunimi kultureqarnermut sunngiffimmullu susassaqarfiit akisussaaffigissavai, Kristian Jeremiassenilu (IA) tassani siulittaasunngussaaq.

Kommune Qeqertallip borgmesterissaa, Inuit Ataqatigiinneersorlu, Ane Hansen, kommunip aningaasaqarnermut aqutsisoqarfissaani "Inua"-mi siulittaasunngussaaq.

Kommunip suliassaasa taamatut aaqqissuunnerisigut kommunissami ingerlatsinerup pisariitsuunissaa akisunngitsuunissaalu ikaarsaariarnermi ataatsimiititaliap anguniaraa, Ane Hansenip KNR-imut oqaatigereerpaa.