Assi: KNR

Immikkut ilisimasalik: Ataatsimiititaliani qalliuneq naalakkersuisooqatigiinnut unammillernarsinnaavoq

Naalakkersuisut illuatungiliuttunik Inatsisartut ataatsimiititaliaanni tallimaannarnik ilaasortaqarfiusuni mattussinerat siunertalimmik iliuuseqarneruvoq

Nunatsinni tamat oqartussaaqataanerisa oqaluttuarsartaa pillugu adjunkti immikkullu ilisimasalik, Jens Wendell-Hansen taama oqarpoq.

- Naalakkersuisut taama iliornerat siunertalimmik iliuuseqarneruvoq.

Ima paasillugu, naalakkersuisut suut oqaluuserisassanngortinneqassanersut nammineq aalajangersinnaavaat, namminnerlu isumartik malillugu ataatsimiititaliami suliaqartoqarnissaa qulakkeersinnaallugu.

- Illuatungaatigulli aamma illuatungiliuttut isornartorsiutimik tusaaniarneqannginnerat pillugu avoqqaarisinnaanerat ammaanneqarpoq.

AAMMA ATUARUK Illuatungiliuttut ataatsimiititaliami inissaqarpallaanngitsut

Ilisimatusarfimmi adjunkti Jens Wendell-Hansen, partiit naalakkersuisuutitaqartut ataatsimiititaliani inissat amerlanersaannik tigusinerisa illuatungiliuttullu ataatsimiititaliani anginerni mattunneqarfigisinnaanngisaminniinnaq inissamik tunineqarnerisa kingorna taama naliliivoq.

Ataatsimiititaliani inissat D'hondtip periusaa naapertorlugu agguaanneqarnerat, naalakkersuisooqatigiillu illuatungiliuttunik mattussisinnaanerat periarfissaasoq Wendell-Hansenip erseqqissaatigaa.

Taamaakkaluartoq aamma sapiiserneruvoq, pissaanermik tamakkiisumik tigusiniartutut isigineqalersinnaammata, tamannalu tunngavigalugu isornartorsiorneqarsinnaanertik ammaakkamikku.

- Pissaanermik tamakkiisumik tigumminninniarnertut pisuutitsisoqarluarsinnaavoq. Tassalu Naalakkersuisut allanik tusaaniagaqaratik ingerlatsiniarnerarlugit.  

Taamaammat Jens Wendell-Hansen isumaqarpoq Naalakkersuisut pissaanermik tamakkiisumik tigusiniartutut ikinnerussuteqartunillu soqutigisaqanngitsutut  illuatungiliuttunit saqqummiunneqarsinnaassappata Naalakkersuisut isornartorsiorneqarnerunissartik ammaatissagaat.

- Tamannalu Naalakkersuisunut sanngiillisaataasinnaavoq.

Ataatsimiititalianimi sulinerup ilaatigut siunertaraa inatsisissatut siunnersuutit misissorluarneqarnissaat aammalu amigaateqarnersut pitsaanerulersinneqarsinnaanersullu qulakkeerniarsaralugu. Taamatullu suliaqarnissaq siunnersuutinut akerliusunut siunnersuuteqartunit orniginarnerusarpoq.

AAMMA ATUARUK Illuatungiliuttut ataatsimiititaliami inissaqarpallaanngitsut

Taamaammat illuatungiliuttunik mattussisoqarneratigut isummersuutigineqartut tamakkerlugit Inatsisartunit pissariarineqanngitsoorneqarsinnaapput.  

- Nammineq siunnersuutigisat pineqarnerat, isorinnittunillu peqataatitaqarani tusaaniagaqaranilu sulinermik tamanna pissuteqarpoq. Tamannalu navianaateqarluaratarsinnaavoq.

Nunatsinni tamat oqartussaaqataanerisa oqaluttuarisaanerat tunngaviusumillu inatsisit pillugit adjunkti Ilisimatusarfimmeersoq, Jens Wendell-Hansen, taama oqarpoq.

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl