Ataatsimiititaliani inissitsiterput
Inatsisartut ataatsimiititaliaat nutaanik siulittaasortaarlutillu aamma ilaasortartaarput, naatsorsuutigineqareersutut naalakkersuisooqatigiit siulittaasuuffiit tamaasa tiguaat, illua´tungiliuttuni Kattusseqatigiit Partiiata ilaasortaatitatuaa Anthon Frederiksen ataatsimik ilaasortaaffeqalerpoq, tassalu Nunat Avannarliit Killiit Siunnersuisoqatigiiffianni ilaasortanngorami. Demokraatit ataatsimiititaliani tamani ilaasortaatitaqalerput. Ataatsimiititaliat pingaarnersiorlugit qimerluualaariartigik:
aningaasaqarnermut ataatsimiititaliami siulittaasunngorpoq Atassummit Ellen Christoffersen, landskarsip naatsorsuutaasa kukkunersiorneqartarnerannut ataatsimiititaliami siulittaasunngorpoq Atassummit Kristian Jeremiassen, nunanut allanut sillimaniarnermullu ataatsimiititaliami siulittaasunngorpoq Siumumit Lars-Emil Johansen, ilaqutariinnermut ataatsimiititaliami siulittaasunngorpoq Inuit Ataqatigiinnit Agathe Fontain, peqqissutsimut ataatsimiititaliami siulittaasunngorpoq Siumumit Jens Lars Fleischer, kultureqarnermut ilinniartitaanermut ilisimatusarnermut ilageeqarnermullu siulittaasunngorpoq Inuit Ataqatigiinnit Juliane Henningsen, aalisarnermut piniarnermullu ataatsimiititaliami siulittaasunngorpoq Inuit Ataqatigiinnit Ane Hansen, inuussutissarsiornermut ataatsimiititaliami siulittaasunngorpoq Ruth Heilmann kiisalu namminersornermut ataatsimiititaliami siulittaasunngorpoq Inuit Ataqatigiinneersoq Kuupik Kleist.
