Ataatsimiititaliamut ilaasortat ilaannaat angalasut
Inatsisartut Nunanut Allanut Sillimaniarnermullu Ataatsimiititaliaat Belgiami illoqarfiit pingaarnersaannut, Bruxelles-imut maanna angalavoq. Ataatsimiititaliaq danskit ministeriinik marlunnik tamanna sioqqullugu oqaloqateqartoq, ataatsimiititaliap siulittaasua, Inuit Ataqatigiinneersoq, Pipaluk Lynge KNR-imut uppernarsaavoq.
Ataatsimiititaliamut ataavartumut ilaasortat tallimaapput. Angalaqataasulli sisamaannaapput. Naleqqap siulittaasua, aamma ataatsimiititalimi siulittaasumut tulliusoq, illua-tungiliuttuniillu ataatsimiititalimut ilaasortatuaasoq, Pele Broberg, nunatta inatsisiliortuisa nunanut allanut kiinnerlutik paasisassarsiornerannut peqataanngilaq. Tamanna Pipaluk Lyngep KNR-imut uppernarsarpaa. Taassumali siulittaasutut Pele Brobergip angalaqataannginnera oqaaseqarfigerusunngilaa, angalaqataanngitsorlu innersuullugu.
Apersoqqunngitsoq
Apersoqqunngitsoq KNR-ip Pele Broberg attaveqarfigaa. Naleqqap siulittaasuata Bruxellesimiiinnani Nuummiinnini KNR-imut aamma uppernarsapaa. Kalaallit Nunaata nunanit allanit soqutigineqartorujussuunerani sooq ataatsimiititaliamut susassaqartumut, ilaasortaaffimminut, maanna angalasumut, angalaqataannginnera KNR-ip paaserusukkaluarpaa. Tamannali pillugu Pele Broberg apersoqqunngilaq.
Facebookkikkut nassuiaasoq
Pele Broberg KNR-imit sooq angalaqataannginnerluni apersoqqunngeriarluni inoqatinut attaveqaatit atorlugit nassuiaateqarpoq.
Naleqqap siulittaasua Sisimiunit Nuummut ulluni makkunani nutserluni allappoq. Nutserninilu ilaatigut ulapputigigamiuk qinikkatut angalanissaminut piffissaqarani malinnaasuminut allappoq.
- Ukorsiinnguiinaa, tusagassiortoq oqarfigaara marloriarlunga inuiaqatigiit akiligaanik Bruxelles-imeereerlunga, massakkut ilaqutannguakkalu Sisimiuniit Nuummut nutsertugut.
Pele Broberg illoqarfimmit illoqarfimmut taamaallaat nutserani aamma nalunaarpoq. Inatsisartoqarfimmimi aamma allaffittaani ulapputigalugu allappoq.
- Taamatuttaaq qinersinerup kingorna maanna pingajussaat Inatsisartut siulittaasoqarfianit nuutsitaasugut, allaffeqartarnata suliassaqarluta, illua-tungiliuttut siuttuat allappoq.
Inatsisartut Nunanut Allanut Sillimaniarnermullu Ataatsimiititaliaannut ilaasortat allat tamarmik naalakkersuisoqatigiinneersuupput, tassaallutik Demokraatineersoq Justus Hansen, Inuit Ataqatigiinneersoq Nivi Rosing aamma Siumumeersoq Erik Jensen.
