Ataatsimiititaliami sulineq eqqissisimaneruvoq
Inatsisartut aappaagumut aningaasanut inatsisissatut siunnersuummik aappassaaneerinninnerat pequffaffiuvoq, allaat tatiginnikkunnaarnermik taasisoqangajalluni, illuatungiliuttullu ataatsimiinnerup aqunneqarnera akerleralugu ataatsimiittarfimmiit aniallutik.
Aningaasaqarnermut atatsimiititaliap kisitsiserpassuit nassuiaaterpassuillu aningaasaqarnermut naalakkersuisumit Palle Christiansenimit takkussuuttut ajunngitsumik suliarineqarnissaat Inatsisartunut ilaasortaqatitik sinnerlugit qulakkerniartarpaat.
Illuanik Palle Christiansenip aningaasaqarnermut inatsimmi immikkut aningaasaliiffigisassat pillugit partiit assigiinngitsut oqaloqatigisussavai. Tassalu aningaasaqarnermut naalakkersuisup partiinik oqaloqateqarnerani aammalu inatsisartut ataatsimiittarfianni akerleriinnerit pisarput.
Aningaasanut inatsisissamik suliaqarneq ukioq manna allaaneruvoq, juunimi qinersisoqarnera malitsigisaanillu partiit nutaat naalakkersuisunngorneri pissutigalugit. Tassalu aningaasanut inatsisissaq kingusissumik saqqummiunneqarpoq, qaavatigullu aamma allannguutissatut siunnersuutit 206-it inatsisissap aappaassaaneerneqarnissaanut saqqummiunneqarlutik.
Tassalu Aningaasaqarnermut ataatsimiititaliaq tamannarpiaq peqqutigalugu ataatsimoortumik inassuteqanngitsoq, ataatsimiititaliap siulittaasua, Naaja Nathanielsen oqarpoq.
- Aningaasanut inatsisissap suliarinera pitsaalluinnartumik ingerlasoq, isumaqarpunga, Inatsisartunilu pingajussaaneerlugu suliarinissaanut ataatsimiiititaliami suliassagut naammassissagivut qularutiginngilluinnarpara. Aningaasanut inatsisissatut siunnersuutip annersaa tamanit isumaqatigiissutigineqarpoq, ataasiakkaannguillu kisimik oqallissuttaapput. Tassa immikkuualuttut isumaqatigiinngissutigineqarput, aningaasanullu inatsisissap pingajussaaneernissaata tungaanut partiit ataatsimiititaliamit qulangersimaneqaratik, isummatik aniatittariaqarpaat, Naaja Nathanierlasen oqarpoq.
Taanna naapertorlugu, aningaasanut inatsisissami aaqqiagiinngissutaasut tassaaneruppput, inissialiornermut sanaartornermullu tunngasut. Taakkuali partiit naalakkersuisullu akornanni oqallisigineqartussaapput, aningaasaqanermut ataatsimiititaliap sulineranut attumassuteqaratik.
Kisianni tassa qanorluunniit isumaqatigiinngitsigisoqaraluarpat, aningaasanut inatsisissaq naammassillugu suliarineqassaaq. Siunnersuut Inatsisartut ukiakkut ataatsimiinneranni suliat kingullersarissavaat, novembarip 27-ani suliarineqassalluni.
- Taanna sioqqullugu, minnerpaamik ullut pingasut-sisamat sioqqullugit Aningaaqarnermut ataatsimiititaliamiit isumaliutissiissut tunniutissavarput, tassanilu inassuteqassaagut, Naaja Nathanielsen oqarpoq.
