Ataatsimiisitaliap suliaq ingerlaqqequaa
Suliniummi pilersaarutaavoq Nunatsinni illorsuit pisoqaanersaasa ilaasa iluarsaanneqarnissaat, ilaatigut ataatsimiittarfinngortillugit, taassumalu saniatigut illuaqqat unnuisarfiit 15-t sananeqarnissaat aamma pilersaarutaavoq.
Taama oqaluttuarpoq ataatsimiititaliap siulittaasua Siumumeersoq Palle Jeremiassen. Taanna Ilimanami innuttaasut ataatsimiisinneqarmata peqataavoq. Innuttaasullu suliniummut qujarussisimapput.
- Uani eqqartorneqartuarmat innuttaasunngooq peqataatillugit, innuttaasut aningaasaleeqataatillugit, suliamut ingerlataq sammitinneqartariaqartoq. Kisianni nammineq tusarniaanitsinni ilimanarmiut oqariartorput namminneq suliamut aningaasanullu taama amerlatigisunut qilersornissartik akissaqartinnagu. Taamaattumik aningaasat avataaninngaanneertut tassunga atorniarneqartut qujarullugit peqataaffigerusullugillu, Palle Jeremiassen oqarpoq nangillunilu:
- Tassa massakkut innersuussivugut kommunalbestyrelsimut suliap ingerlaqqinnissaa innersuullugu. Ataatsimiititaliami ilaasortat tamarmiullutik isumaqatigiipput suliaq ingerlaqqissasoq. Taannalu aamma innersuussutigivarput kommunalbestyrelsimut, Palle Jeremiassen oqarpoq.
Pilersaarutaavoq Qaasuitsup Kommuniata, Realdania Byg aamma World of Greenland suleqatigalugit, Ilimanami talittarfimmik nutaamik, kuuffilersuinermik inuinnaallu aqqutaannik iluarsaanermik tapersiuteqarnissaa.
Kisianni tassa Inuussutissarsiornermut, Aatsitassarsiornermut Takornariaqarnermullu ataatsimiisitaliaq nalornisinneqalersimavoq ilumut kommuunimi taamatut isumaqatigiissuteqarsinnaanersoq, taamaattumillu Unammilleqatigiinnermut Ataatsimiititaliamut Kommuunillu Nakkutilliisoqarfianut kommuunip isumaqatigiissutaa naliliiffigeqqullugu saaffiginnissuteqarsimavoq:
- Konkurrencerådimut taavalu aamma tilsynsrådimut ingerlateqqissimavarput uani apeqqusiisoqartarmat ilumut kommuuni taamatut pituttorsinnaanersoq. Tamakkua apeqqutit erfatsikkusunnagit taamaasilluta akissutissarserusullugit tilsynsrådimut konkurrencerådimullu ingerlatissimavarput. Taamaalilluta kommunalbestyrelsimut akissutissaqassangatta taakkua qanoq inatsisitigut inissisimanersut, Siumeersoq Palle Jeremiassen taama oqarpoq.
Unammilleqatigiinnermut Ataatsimiititaliaq akissuteqareersimavoq. Palle Jeremiassen malillugu Unammilleqatigiinnermut Ataatsimiisitaliaq suliamut naliisinnaanngilaq, suliaq Kommuunit Nakkutilliisoqarfiannit kisimi akineqarsinnaammat. Nakkutilliisoqarfilli suli akissuteqarsimanngilaq.
Ilimanami suliniut sammineqalerpoq, borgmester Ole Dorph, Ilimanami illorsuit marluk pisoqqat marluk pillugit innuttaasunik ataatsimiititsinermut takkummat. Takkunnerminimi nalunaarutigisimavaa inuinnartut peqataanini, borgmesterituunngittorlu. Ataatsimeeqataasullu arlallit oqaluttuarnerat malillugu Ole Dorphip suliniut, Qaasuitsup Kommuniata, Realdania Bygip aamma World of Greenlandip isumaqatigiissutigisimasaat apeqqusersimavaa.
Ole Dorph Ilimanamut tunngatillugu suliamut soqutigisami aporaannerat pissutigalugu ataatsimiinnermi peqataasimanngilaq. Taamaattumik aamma innuttaasunik ataatsimiisitsinermi kommuuni sinnerlugu borgmesterip tullersortaa Ole Dorph najuussimavoq.
Qaasuitsup Kommuniata, Realdania Bygip aamma World of Greenlandip suleqatigiilernerat KNR-ip marsimi saqqummiuppaa. Taamani borgmesteriusup, Jess Svanep, kommuuni sinnerlugu suleqatigiinnissamut isumaqatigiissut atsiorpaa. Tamatumalu kingorna kommuuninut qinersisoqarpoq Ole Dorphilu borgmesterinngorluni.
