Ataatsimiinnerit allatut aaqqissuuteqquaat
Siunnersuutigaat ukioq tamaat ataatsimiittoqartarsinnaanera imaluunniit ukiakkut upernaakkullu ataatsimiinnerit sivitsorneqarsinnaanerat.
- Suliat sukkanerusumik suliarineqassappata, Inatsisartut suliariaasiat misissorneqartariaqarpoq. Suliaaserlu oqaluuserineqalerpat, ukiakkut upernaakkullu ataatsimiinneq kisiisa pinnagit, ukiorli tamaat ataatsimittarnissaq aalajangiunneqarsinnaavoq. Taamaalilluni ukiakkut ataatsimiinnermi sorpassuit ataatsimoortillugit suliarisariaarutissagaluarput, Aningaasaqarnermut Naalakkersuisoq Palle Christiansen oqarpoq.
Aningaasaqarnermut Naalakkersuisoqarfik Inatsisartut ukiakkut ataatsimiinneranni isornartorsiorneqarpoq, Inatsisartut ataatsimiititaliaasa Inatsisartunullu ilaasortat apeqqutaannut kingusippallaamik akisarnerarlugu.
- Ilumoorsinnaanngilaq, allaffeqarfik ukiumut qaammatialunni unnuaarullugu ulapittassasoq, taavalu qaammatini allani eqqissisimanarnerulluni. Taava suliassat ukiumut tamakkiisumut agguataaraanni, tamanut pitsaanerpaassaaq, Aningaasaqarnermut Naalakkersuisoq oqarpoq.
Suliassammi ulapippallaarluni suliarigaanni kinguneqarnerloriaannaavoq:
- Sulisugut taakkuinnaatillugit ingerlaannartumik kukkuneqanngitsumillu akissuteqartarsinnaanngilagut. Sukkanerusumik akissusiortalissagutta, taakkualu nutsertillugit nassiussuullugillu, taava kukkunissarput qaninnerulissaaq. Tamanna nalunanngilaq, aamma allani tamani taamaappoq, Palle Christiansen oqarpoq.
Ataatsimiittarnerit aaqqissuunneqarnerat allanngortinneqassasoq Inatsisartuni allanit aamma kissaatigineqarpoq. Palle Christiansenip parteeqataa, Niels Thomsen oqarpoq, ulapaartarneq aamma misigisimallugu:
- Taassuma malittaanik suliap pitsaassusaa ajoraluartumik aamma akunnassisinnaasarpoq. Uanga takorloorsinnaagaluarpara, ataatsimiittarnerit sivitsorneqarsinnaasut.
Taamaattoqassanngippat Niels Thomsenip siunnersuutigaa, ukiakkut ataatsimiinneq aningaasanut inatsisissap suliarineranut annerusumik atorneqartassasoq, suliassat allat amerlanersaat upernaakkut ataatsimiinnerup sivitsorneratigut suliarineqarsinnaallutik.
Siumumeersup Aleqa Hammondip aamma ukioq kaajallallugu ataatsimiittarnissaq pilerigaa.
- Inatsisartutut sulineq ukioq kaajallallugu sulineruvoq, piffissap qanoq ilineraniluunniit aggersarneqarutta, pisussaavugut aggissalluta. Siumumiit ersarissorujussuarmik oqariartortarnikuuvugut, Inatsisartut sulinerata sivisunerusumik ingerlanneqarsinnaaneranut ammalluta, aammalu ataatsimiititaliat toqqissisimanartumik pitsaasumillu sulissasut. Inatsisartut toqqissisimanerusumik sulinissaat, tukumatinneqaratik ingerlanissat isumaqatigaarput, Aleqa Hammond oqarpoq.
Aningaasanut inatsisissat suliarinissaannut piffissaqarnerunissaq, Aningaasaqarnermut ataatsimiititaliami siulittaasup, Naaja Nathanielsenip kissaatiginartippaa:
- Qaammatinik marlussunnik piffissaqarnerunissaq iluassaqaaq, taanna oqarpoq. Aammali oqarpoq, Inatsisartut ukiakkut upernaakkullu ataatsimiittarnerisa katersuunnermik ataatsimik ilaqqinneqarsinnaaneri Inuit Ataqatigiit gruppiata isummerfiginikuungikkaa.
Aammali Naaja Nathanielsen oqarpoq, ukioq tamakkerlugu ataatsimiittarnissaq pilerinarpallaanngitsoq, Inatsisartunut ilaasortat, Nuummi najugaqanngitsut eqqarsaatigalugit. Tamannali Niels Thomsenip aaqqiissutissaqartippaa.
- Isumaqarpunga taanna aaqqinneqarsinnaasoq, soorlu taakkua illoqarfimminnut angerlartarnerannut periarfissaq pitsanngorsarlugu imaluunniit ilaquttaminik tikisitsisinnaanerat suli annertusaaffigeqqillugu.
Aammali Naaja Nathanielsenip erseqqissarpaa, Inatsisartut ataatsimiittarnerisa allanngortinneqarsinnaanera pillugu oqallittoqassappat, Inuit Ataqatigiit aamma piareersimasut.
- Qarasaasiatigut attaveqatigiinnermut atortut atorneqarnerulerpata immaqa ajornavianngilaq. Kisianni tassa oqalliseqataanissamut piareersimavugut, taava takussavarpoq qanoq aaqqiisoqarsinnaanersoq.
