Ataatsimiinneq kingulleq inatsisartuni
Inatsisartut upernaakkut ataatsimiinnerat ullumi naammassineqassaaq, ataatsimeeqataasussalli ataatsimiinneq sivisunaassagunarpaat.
Ullormut oqaluuserisassat katillugit 17-iussapput, ilaatigut aamma aningaasanut inatsit 2005-moortoq eqqartorneqassalluni.
Demokraatinit siunnersuutit arfiniliussapput, ilaatigut Per Berthelsenip siunnersuutigaa, Naalakkersuinermik suliaqartut tamakkiisumik Naalakkersuisutut sulisalernissaat anguniarneqassasoq. Naalakkersuisut atorfimmik saniatigut allamik atorfeqartannginnissaat malittarisassiuunneqassaaq, taannalu inatsisartuni aalajangiiffigisassatut siunnersuut ullumi eqqartugassat ilagaat.
Avannaani aalisartuaqqat Sinerissami aalisartut assigalugit, umiatsiaararsiniartarnerminni pisortanit taperneqartalernissaat, Inuit Ataqatigiinneersup Ane Hansen-ip siunnersuutaa ullumi aamma eqqartorneqassaaq.
