Evaldsen: Ataatsimiinneq iluatsilluarpoq

Demokraatit ukiakkut ataatsimiinnerup ingerlanerani illuatungiliuttooqataariarlutik Naalakkersuisooqatigiinnut ikorfartortaalerput.

Randi Vestergaard Evaldsenip partiimut ukiakkut ataatsimiinnermisuna pitsaasuusimanersoq nammassinerani qularutiginngilaa.

- Ilaatigut mittarfinnut tunngasut iluatsinneqarput, aammalu aalisarnerup iluani suleqatigiissitanik pilersitsisoqarnissaa, aningaasanullu inatsit pitsaalluinnartoq aamma tunuliaqutaaffigivarput, tassani siunissaq ungasinnerusoq isigalugu isumannaarigatta. Ilaatigut pisortaqarfinninngaanniit sipaarfissat annertoorujussuit qiviarneqartussaapput, aammalu akileraarutitigut apparsaanerit, Demokraatit siulittaasuata tullia, Randi Vestergaard Evaldsen taama oqarpoq.

Randi Vestergaard Evaldsenip ukiakkut ataatsimiinnermi suliarpassuaqarlutik erseqqissaatigigaluarlugu ataatsimiinnerit naammassisut ajortumik oqaasissaqarfiginngilai.

- Oqaatigisaqarsinnaanngilagut iluatsinngitsunik. Ataatsimut isigalugu una inatsisartut ataatsimiinnerat ajunngitsorujussuartutut nalilerparput. Isumaqarpugut ingerlalluarluta, aamma ataatsimiinnissap tulliani taanna ingerlateqqissvarput uagut tungitsinninngaanniit, Randi Vestergaard Evaldsen oqarpoq.

Inuit Ataqatigiit naammassisaqarluartutut misigisimapput

Inuit Ataqatigiit upernaaq qinersinerup kingorna illuatungiliutilerneranniit ukiakkut ataatsimiinneq siulliuvoq, Mimi Karlsenillu oqarnera naapertorlugu naammassisaqarfiulluarpoq.

- Isumaqarpunga ataatsimiinneq iluatsilluartutut inissisimalluarfiusutullu ittoq, tassa suliassiissuterpassuarnik 32-t missaannik siunnersuuteqarpugut, taakkunanngalu 14-it akuerineqarput, taavalu ilai arfineq-pingasut akuersissutigineqaratik, taavalu ilai upernaamut suliarineqartussatut ingerlaqqillutik, Inuit Ataqatigiit ilaasortaatitaasa siulittaasuat Mimi Karlsen taama oqarpoq.

Taassuma meeqqanut inuusuttunullu iliuusissatut pilersaarusiortoqarnissaata akuerineqarnera Naalaakkersuisullu pisortatigoortumik piitsuussutsimut killiliissusioqquneqarnera pingaartumik nuannaarutigai.

Naalakkersuisut paarlakaannerujussuat isumakuluutigaat

- Ukiaq manna ataatsimiinneq aamma malunnartorujussuarmik naalakkersuisut, inatsisartunilu ataatsimiititaliani paarlakaannerujussuannik sunnerneqarsimammat suliatsinnut soorunami sunniuteqaqaaq, Mimi Karlsen oqarpoq.

Partii Naleraq ukiakkut ataatsimiittoqalinnginnerani Naalakkersuisooqatigiinnit anivoq, taamaammat aningaasaqarnermut isumaginninnermut, ilaqutariinnut inatsiseqarnermullu nutaamik naalakkersuisumik toqqaasoqarpoq.

Vivian Motzfeldt Inatsisartuni siulittaasunngorpoq Doris Jakobsen Jensenillu Naalakkersuisut ataatsimiinnerit ingerlaneranni aamma qimallugit.