Ataatsimeersuartut naammassigallarnavianngillat

Sila pillugu Naalagaaffiit Peqatigiit Balimi ataatsimeersuarneq piffissaq eqqorlugu naammassinavianngilaq, unnuarsuarmulli pissasoq, Danmarkimiit Avatangiisinut aamma Silap pissusaa pillugu ministeri, Connie Hedegaard, ataatsimeersuarnerup nalunaaquttap akunnialui matuma siorna unillatsiarnerani oqarpoq.
Allattoq Mads Lynge
decembarip 14-at 2007 11:57

Oqaluuserisat arlallit isumaqatigiissutigineqareerput, ajornartorsiutilli ministerit Connie Hedegaardip eqimattaqataasa oqaluuseritinniagaat kingullerpaajussapput.

- Suli tassunga killeqqajanngilagut, Connie Hedegaard ulloqeqqata siorna oqarpoq.

Apeqqutit sakkortuut marluk amerikamiunit qularnanngitsumik akerlerineqartussaapput.

Sila pillugu Naalagaaffiit Peqatigiinni paasisimasallit peqqussutigeqqusaat naggaterpiaagut innersuunneqassappat – aamma nunat suliffissuaqarfissuit silaannarmik toqunartortalimmik CO2-mik aniatitsinertik ukiumi 2020-mi 25-t 40 procentillu akornanni millisereersimassagaat isumaqatigiissummi allassimassava?

USA tamatumunnga isumaqataanngilaq, EU-li isumaqataalluni.

- Ataatsimeersuarneq naammassilivippat tamanna tikittussaavarput, Connie Hedegaard nutaarsiassaqartitsivimmut Ritzauimut oqarpoq.