Ataatsimeersuartitsinissap sipaarniarfigineqarnera isornartorsiorpaat
Taakkua marluullutik isumaqarput silap pissusaata allanngoriartornera pillugu Naalagaaffiit Peqatigiit Københavnimi 2009-mi ataatsimeersuartitsinissaanut tunngasut sipaarfiginiarnissaat pissusissamissuunngitsoq.
- 2007-mi ataatsimeersuarnermut sanilliullugu annertunerutigisoq, peqataasussallu nuimanerusussaammata isumannaallisaanaeq annertunerujussuusussaasoq nalunngereerlugu, affaannaanik aningaasaliiffiginiarnera, Juliane Henningsenilu isumaqatiginngilarput, Folketingilu pingaarnertut akisussaasuummat oqaluttarfimmiit isornartorsiuinerput saqqummiuppara, Annita á Fríðriksmørk oqarpoq.
- Silaannaap pissusaata allanngoriartornera eqqartorneqartussaammat aningaasartuutissat ikilisarneqarnerat Kalaallit Nunaannut Savalimmiunullu sunniuteqapilunnissaa ilaatigut aarlerigigatsigu isornartorsiuivugut, isornartorsiummik ullumi saqqummiisoq, Annita á Fríðriksmørk oqarpoq.
Juliane Henningsenip Annita á Fríðriksmørkillu oqaasii naapertorlugit aappaagu ataatsimeersuarnissaq 300 millioni koruuninik akeqassasoq naalakkersuisut siornatigut oqaatigisareerpaat, aningaasartuutissalli pillugit inatsisissatut siunnersuutaanni 240 millioni koruuninik akeqartussatut allanneqarsimavoq.
Kalaallit Folketingimiititaasa aappaata, Lars-Emil Johansenip, oqalugiarnermini namminersulernissaq pillugu kalaallit danskillu isumaqatigiissutaat nersualaarpaa, Danmarkimiillu tapiissutit ikilisikkiartuaarnissaannik neriuutini saqqummiullugu.