Ataatsimeersuarnissamut piareersarneq aallartilluareerpoq
Silap pissusaa pillugu nunarsuaq tamakkerlugu ilisimatuut, suliffeqarfiit politikerillu katillugit 2000-it qaammat ataaseq qaangiuppat ataatsimiissapput, silap pissusaata allanngoriartornera pillugu paasisaminnik nutaanik saqqummiussissallutik.
- Ataatsimiinnissaq pingaarutilerujussuuvoq, politikerimmi eqqortumik aalajangiinissaannut aqqutissiuussisussaagami. Ataatsimiinnissap siunertaa pillugu, ilisimatooq Katherine Richardson, taama oqarpoq.
- Iliuuseqapallannissarput pisariaqartoq paasitissallugu pingaarnerpaavoq, aamma nunat tamalaat Kyotomi isumaqatigiissutaata 2012-imi taarserneqarnissaanut pilersaarummik atorfissaqartitsisugut paasitittariaqarparput, Katherine Richardson naggasiivoq.