Ataatsimeersuarnissamut akerliussutsimik takutitsisussat nakkutigineqarluassapput
Inatsisissatut siunnersuummi Danmarkimi naalakkersuisunit ullumi saqqummiunneqartumi tamanna anguniarneqarpoq. Allaffissornikkut kiffaanngissusiagaanermik taaneqartartut ilaatigut naalakkersuisunit sivitsorniarneqarput, taamaalilluni inuit arlaannik perulluliortut akunnerni aqqaneq-marlunni politiinit tigummineqarallarsinnaalerniassammata.
Silap pissusaa pillugu ataatsimeersuarnissaq sioqqullugu pissutsit nutaat taakku politiit peqatigiiffiata pisariaqartuunerarpai. Perulluliornerit siusinnerusukkut, assersuutigalugu nunat pisuut G20-nik pineqartartut ataatsimeersuarneranni pisimasut siulittaasup Peter Ibsenip innersuussutigai.
Atuakkiortorli Knud Vilby tassunga isumaqataanngilaq. Ataatsimeersuarnissamut atatillugu akerliussutsimik takutitsinissat angisuut ilaannut taanna oqaaseqartartuuvoq.
Arlaleriarluni sukaterisoqartareerpoq aamma politiit atorfissaqartitatik tamaasa pigereerpaat, inatsisilerituullu amerlanersaasa tamanna isumaqatigaat, taamaammat sukatereqqinnissaq atorfissaqartinneqanngilaq.
Knud Vilbylu aperineqarnermigut akerliussutsinermik takutitsinissamik aaqqissueqataaffigisaanut sukaterinerineq qanoq sunniuteqassanersoq, naalakkersuisut oqqassaarutaata taassuma angajoqqaat, ilaqutariit meerartallit akerliussutsimik takutitsinermut peqataanissamut annilaangalersissinnaagai aarleqqutigisinnaagitsik akissutigaa.
Naalakkersuisummi politiillu taama annertutigisunik pisoqarnissaanik oqariartuuteqartillugit, uagut susoqassanngitsoq oqariartuutigigaluarutiguluunniit inuit ersilersinnaapput. Naalakkersuisut una oqqassaanerineraat, taama iliornissamulli tunngavissaqanngilaq taamaammat inuit qanorluunniit pisoqaraluarpat takkuttariaqarput.
Aperineqaramilu ulorianartoqannnginnera qanoq qularnaarsinnaaneraa; tamanna qularnaarsinnaannginnerarpaa, eqqissisimasumilli akerliussutsimik takutitsinerit angisuut ingerlanneqartarnerat ileqqorineqartoq ukiorlu manna arlallit ingerlanneqareersut, unalu angineruinnartussaasoq oqaatigaa.
Ulorianartoqannginnissaa kialuunniit qularnaarsinnaanngilaa, aamma Brian Mikkelsenip inatsimmik sukaterinermigut inuit ataasiakkaat perulluliunnginnissaat angusinnaanngilaa, taama iliortut politiinit isumagineqartarmata.
Maannali iliuuserineqartup, nakuuserneq atorneqartussaanngikkaluaq pilersissinnaavaa, matumanimi nunami allamiut ilaat aamma maani Danmarkimi inuit ingasattajaartumik eqqarsartartut ajuallatsinneqarsinnaapput, taamaalillunilu politeeqaraluartoq iliuuseqarsinnaanerminnik takutitsisillugit. Inatsisissamik saqqummiussinikkut pitsaasumik angusaqartoqarsinnaanngilaq, tamannalu silap pissusaa pillugu ataatsimeersuarnissamut iluaqutaasussamik akerliussutsimik takutitsinissamik suliaqartunut inunnut akornutaavoq.
