Ataatsimeersuarnissami biskoppi naalagiartitseqataalerpoq

Silap pissusaa pillugu Københavnimi ataatsimeersuartoqalerpat, Nunatta Biskoppia Sofie Petersen biskoppiuneq Desmond Tutu peqatigalugu silap pissusaanut tunngatillugu naalagiartitsiniarput.
Allattoq Oline I. Olsen
novembarip 19-at 2009 06:49

- Københavnip oqaluffissaarsuani upperisarsioqatigiit assigiinngitsut peqataaffigisassaannik naalagiaqatigiittoqarniarpoq. Tussiaqattaartartut Aavaat naalagiaqatigiinnermi peqataassapput naalagiaqatigiileruttalu qinnusseqataassaanga, biskop Sofie Petersen oqarpoq.

Biskoppip qinnussinissaminut atatillugu karseerannguamik nassataqassaaq.

-Sermersuup aakkiartornerani ujaqqanik nuisimasunik nassataqassaanga qinnussilerumalu taanna tigummiassavara, karseerannguup takutissavaa ilumut silap pissusaata allanngoriartornera Nunatsinni aamma sunniuteqartoq.

- Naalagiaqatigiittoqalerpat nunarsuarmi oqaluffippassuit siarngit sianertinneqassapput, neriuppungalu Nunatsinni oqaluffiit siarngi ulloq taanna sianertinneqassasut kaammassuutigerusuppara, Sofie Petersen oqarpoq.

Nittartakkami biskopeqarfik.gl-imi atsiornernik katersisoqaleruttorpoq, atsiortitsinermi sila pillugu isumaqatigiissutissami, nunat piitsuunerpaat politikerinit isiginiarneqarnissaat kajumissaarutigineqarpoq.

Atsiornerit Naalagaaffiit Peqatigiit qullersaannut Ban Ki-moonimut Desmond Tutup decembarip 13-ianni tunniutissavai.