Ataatsimeersuariat Balimut tikeraleruttorput
Avatangiisit pillugit naalakkersuisut nunanit tamaneersut – aamma Kalaallit Nunaanniit – Balimi Naalagaaffiit Peqatigiit silap pissusaa pillugu ataatsimeersuarnissaannut peqataassallutik tikeraleruttorput, tamaani sapaatip akunnera sinnerlugu atorfilitaat piareersareersullu. Isumaqatigiinngissutitoqqat allanngorsimanngitsut ersarissereerpoq.
Balimi ataatsimeersuarnerup siunertaraa ukiut qulit matuma siorna Kyotomi isumaqatigiissutip taarsernissaanut isumaqatigiinniarnerit aallartisarnissaat pilersaarusiornissaallu. Silallu kissakkiartornera 2 gradinut killilerniaraanni, 1990-imi CO2-mik aniatitsinermut naleqqiullugu 2020-mi aniatitsineq 25 procentit 40 procentillu akornanni millisinneqartussaasoq, isumaqatigiinniutigineqartuni allaqqagallarpoq. Isumaqatigiinniarnermi aallarniutaasut EU-p akuersaarlugit CO2-mik aniatitsinini 30 procentimik appartinniarlugu neriorsuigaluarpoq, nunalli allat aamma taamatut aniatitsinerminnik millisaarusussinnaappata, USA-li taamatut millisitsiniarnermut isumaqataanngilluinnarpoq. Naak siunniunneqartussat aalajangiissutaasussatut isigineqartussaanngikkaluartut amerikamiut aniatitsinermut milliliinissat kisitsisilersornissaat akerlerilluinarpaat. Bushimimmi naalakkersuisuutitaanillu aningaasaqarnikkut ineriartorneq pingaarnerutinneqarpoq, nunallu tamarmik isumaqatigiinissaat anguniarneqarmat USA-p iliuusererusutai isumaqatigiinniarnernut sunniuteqartussaapput. Isumaqatigiinniarnerimmi pilersaarusiornerat USA-p isumaa avaqqullugu nunanit allanit aallartinneqarusunngilaq. Naluneqanngilarmi amerikamiut Kyotomi isumaqatigiissummut atsioqataasimannginnerat isumaqatigiissutip atuutsinniarneranut sanngiillisaaqataasimasoq. Maannakkut CO2-mik aniatitsinerpaat Kina Indialu, isumaqatigiissummut nutaamut akuliukkusunngillat nunat suliffissuaqarfiit allat isumaqatigiissummut isumaqataanngippata. Naalagaaffiit Peqatigiit isumaqatigiinniartitaat Eva de boor, ajornartorsiutinik millisaasutullusooq oqarpoq, maanna siunissami isumaqatigiinniarnissat aallartisarneqaannartussaasut qanorlu ingerlanissaat pilersaarusiorneqaannarluni.
