Ataatsimeeqatigiittussat akaareqatigiippallaarnavianngillat

Namminersorlutik Oqartussat pisortaqarfiata aalisakkanillu tunisassiorfittut ingerlatseqatigiiffiup Arctic Green Foodip sinniisui sapaatip akunnerata tulliani Nuummi ataatsimiilerpata akaareqatigiinneq pitsaanavianngilaq.
decembarip 03-at 2009 15:51

Ataatsimiinnermi tassani isumaqatigiinniutigineqassaaq nunaqarfinni tunisassiorfinni qulingiluaasuni, Arctic Green Foodip Kalaallit Nunaanni sumiiffinni arlalinni ingerlataani, kiffartuussinissamik isumaqatigiissutip nutarterneqarsinnaanera.

Akaareqatigiinnginneq pinngorpoq Arctic Green Foodip sapaatip akunnera ataaseq qaangiummat sulisuni tamaasa soraarsimmagit.

Arctic Green Foodip tamatumunnga atatillugu tusagassiorfitsigut nalunaarut qulequtaqartoq "Nunaqarfiit matuneqarput" nassiuppaa. Taamaalillunilu nalunaarut naalakkersuinermik sulialinnut ingerlateqqinneqarpoq.

Arctic Green Foodip nalunaarutigeqquaa soraarsitsinerit nunaqarfiit qulingiluat tunisassiorfiisa ingerlatiinnarneqarnissaannut 2010-mut kiffartuussinermik isumaqatigiissutip nutaap isumaqatigiissutiginissaata kingusinaarunneqarneranik pissuteqartut.

- Nalunaarut Aalisarnermut, piniarnermut nunalerinermullu naalakkersuisup, Ane Hansenip sallunaveeqqutitut pinngitsaaliinertullu oqaatigaa.

- Aningaasanut inatsit inisseqqaartariaqarpara kikkut isumaqatigiinniuteqarfigissanerlugit sunalu pillugu, tamannalu ingerlatseqatigiiffimmut nalunaarutigineqarpoq, Ane Hansen erseqqissaavoq.

Aningaasanut inatsit aqaguani naammassineqarpoq. Maannalu tassa ingerlatseqatigiiffiup nittartagaani atuarneqarsinnaalerpoq, isumaqatigiinniuteqarnissanut qaaqqusineq aqutsisut nuannaarutigigaat taamaattumillu isumaqatigiinniarnerit ingerlatillugit tusagassiuutinut oqaaseqaateqartoqassanngitsoq aalajangerneqarsimasoq.

Atorfilittalli ilaata oqarneratut taamaappat isumaqatigiinniarnermi silaannaq kissarpallaarnavianngilaq. Arctic Green Foodip naalakkersuinermik sulialinnut saassussinera tamatumani pisuuvoq. Inatsisartut aningaasaqarnermut ataatsimiititaliaat tamatumunnga peqatigitillugu ukiuni kingullerni ingerlatseqatigiiffimmik pileriginnissimavoq, aningaasatigut assigiinngitsunik atugassaqartitsinerit pissutigalugit.

Aningaasaqarnermut ataatsimiititaliaq toqqaannartumik allappoq ataatsimiititaliap naatsorsuutigigaa Naalakkersuisut ingerlatseqatigiiffimmit nalunaarusiat ingerlaavartut isornartorsiuerpalaartumik qimerluussagaat, Nunatta karsiata akiliutaasa isumaqatigiissummi anguniagassat naapertorlugit atorneqarnissaat qulakkeerneqassappat.

Isumaqatigiinniarnerit aningaasaqarnikkut killissarititat sukangasuut iluanni pisussanngorput. Katillugit 15 miliioner koruunit nunaqarfinni immikkut suliniutit kontuannut immikkoortinneqarput.

Tamannalu immineq ajornartorsiutaasinnaavoq Arctic Green Foodip siornaannarmut 12 millioner koruunit missaanniittut nunaqarfinni tunisassiorfiutiminut pissarsiarisimappagit Royal Greenlandillu taakkunannga ikinnerulaartut nammineq tunisassiorfiutiminut.

Taamaalilluni 15 millioner koruunit taamaallaat atorneqartussanngorput, ilimananngilarlu aningaasat tamakkerlutik Arctic Green Foodimut Royal Greenlandimullu kiffartuussinissamik isumaqatigiissutinut atorneqassanersut. Aammami nunaqarfinni assigiinngitsunik tunisassiortunik allanik misiliisoqarpoq.