Ataatsimeeqatigiinngitsoorput

Danskit inatsisinik atortitsinermut ministeriat Lene Espersen inatsisinullu atortitsinermut naalakkersuisoq Aleqa Hammond ataatsimeeqatigiinngitsortussanngorput.

Stavangerimi nunani avannarlermi inatsisinik atortitsinermut ministerit ataatsimeeqatigiinneranni taakku ataatsimeeqatigiittussaasimagaluarput.

Aleqa Hammondili naapertorlugu Lene Espersen nalunaaruteqarsimavoq allamik pisassaqarnini peqqutigalugu ataatsimeeqataasinnaanani.

Aleqa Hammond nunatsinni eqqartuussiveqarneq pillugu eqqartueqatigiinniassagamik neriuppoq, ullorlu alla ataatsimiiffissaminnik ulluliisoqarsinnaassasoq.

- Danmarkimiinnerma nalaani piffissaqarlunga ministeri oqarfigereerpara, Aleqa Hammond oqarpoq nangillunilu Københavnimi sisamanngorpat tusagassiortunik katersortitsinissaq allannguuteqarnavianngitsoq unnerpaa.

Eqqartuussiveqarneq pillugu ataatsimiititaliarsuup innersuussutai Namminersornerullutik Oqartussanit qanoq isumaqarfigineqarnersut inatsisinik atortitsinermut naalakkersuisup danskit tusagassiortuinut nalunaarutiginiarlugit sisamanngorpat aggersarsimavai.

- Ministerilu ikioqatigiilluta sukkanerusumik nunatsinni eqqartuussiveqarnerup pitsanngorsarneqarnissaanut suliniuteqarsinnaanissarput neriuutigaara, Aleqa Hammond naggasiivoq.