Ataatavimmik najorteqarani peroriartorneq kanngusuutaasarpoq

"Uersagaaneragaalluni" akerartugaaneq 1950-60-ikkunni meeqqani anaanaannaqarlutik peroriartortut ilaannut ulluinnarsiutaasarpoq - meeqqat inuiaqatigiinni qinngasaagaallutillu ajattugaasarnerannik kinguneqartarluni.

- Allanut oqaluuserineqartussaanngitsutut inuttut nammatat kanngusuutinngortarput. Kanngusunneq misigissusiuvoq kinaassutsimut aserorterisartoq. Inummi amigaateqartutut misigilersarpoq. Ilaa, kukkuneqaramaana/amigaateqaramaana taama misigisunga?, Conni Gregersen nassuiaavoq.

Kanngusuutissinneqarnerlu meeqqamut oqimaassinnaasaqaaq.

- Meeqqat pissusilersuutigilersagaat assigiinngissinnaapput. Ilaat ittoortunngortarput, ilaat imminnut nikanartittunngortarlutik, ilaat matoqqasunngortarput imaluunniit anguniagaqarusussuseqaratik inuulersarlutik. Imminnullu salliutinnatik allat salliutilersarpaat, tarnip pissusaanik ilisimasalik oqarpoq.

Taamaammat kanngunarsagaanerit nikassagaanerillu aqqusaartaraluarlugit inuit ilaasa ingerlariaqqissagunik ataatavitsik ujalersarpaat.

- Maanna TV-kkut aallakaatitassiani ilaqutassarsiortut takusalerpagut. Uanga nammineq sulininni arlalissuit aamma naapittarpakka. Tassaanerusarput meerarsiaallutik peroriartortut, ilaatigut namminneq meerartaartussanngoraangamik angajoqqaavimminnik ujaasilersut. Soormitaavaana taamani anaanaviga ataatavigaluunniit qimallugit angajoqqaarsiaqalersimasunga? Nipangiussineq siornatigut nalinginnaaqaaq, isumaqartoqartarmammi meeraq oqaluttuutinngikkunikku qajassuunnerussallugu. Imaassinnaavormi anaanaasoq ilaqutaasullu sinneri meeraq pillugu aliasuuteqarsimasut. Uangali isumaqartuaannarpunga piviusut nipangiutiinnarnagit eqqartorneqartariaqartut, qanorluunniit atornartigissagaluarpat, Conni Gregersen nangippoq.

Ataatavillu nassaarineqaraangat ataatamik naapitsineq qanorluunniit ikkaluaraangat "uersakkamut" ilivitsunngortitsisarpoq. Inuttut amigaatigineqartuartoq nassaarineqaraangat ilaannut ajortumik ilaannullu ajunngitsumik kinguneqartarpoq.

- Meeqqat ataatavimmit akuerisaanermik ujartuisut ilaat iluatsitsisarput. Ilaat tikilluaqqusaasut ilaat iluatsitsineq ajorput. Qanorluunniilli inerneqaraluartoq alapernaataq akissutissarsineqaraangat, ajattugaasutut misigiuarnermit, pitsaanerusarpoq, Conni Gregersen oqarpoq.