Ataatat periarfeerussat danskiinnaanngillat
Inatsitigut ataataqanngitsunut inatsisikkut nutaakkut ataatavimminnit qanganngoreersumit kingornussisinissamut periarfissaqanngitsunut taarsiissuteqarnissamut aaqqissuussinermut aningaasaliinissaanik Aleqa Hammond danskit naalakkersuisuinut arlaleriarluni siunnersuuteqarsimagaluarpoq.
Danmarkili kisimi akiliisussaagunanngilaq. AG sapaatit-akunnerani uani saqqummersoq taama allaaserisaqarpoq.
Inatsisitigummi ataataqanngitsunut ataataasut ilarpassui kalaaliupput. Tamanna oqaluttuarisaanermik misissiunermi 2011-mi pisumi atuarineqarsinnaavoq.
Kisitsisitigut paasissutissat naapertorlugit aappariinnerup avataani inunngortunut ataataasut 14,6 procentit 27 procentillu akornanni danskiussangatinneqarput, kalaallillu 'uersakkanut' ataataasut 59 procentiussangatinneqarlutik.
AG naapertorlugu, Helle Thorning-Schmidtip Folketingimi apriilip qaammataani oqallinnermi tamanna eqqaavaa, Kalaallit Nunaatalu taarsiissuteqarnissamut aaqqissuussinermut nammineerluni aningaasalersuinissaa siunnersuutigalugu. Aleqa Hammondilli taamaaliortoqassanngitsoq erseqqissaatigisimavaa.
Danmarkimi Inuttut Pisinnaatitaaffiit pillugit Ilisimasaqarfimmit naliliinera malillugu inatsisitigut ataataqanngitsut danskit naalagaaffiat eqqartuussivimmut suliassanngortissagaluarunikku ajugaanissaminnut periarfissaqarluarput.
