Ataatassarsiuussisarneq ajornannginnerulissaaq

Aammattaaq avinnermut angajoqqaatullu oqartussaassutsimut nutaanik malittarisassaqalissaaq. Danmarkimi inatsisinut atortitsinermut ministereqarfik allannguutissamik suliaqarpoq.

Ilaqutariit inatsiseqartitaanerat qanganisaavallaalersimavoq Danmarkimilu malittarisassaninngarnit assorsuaq kinguarsimalluni, inatsisinillu atortitsinermut ministereqarfiup tamanna pillugu annertuunik allannguuteqartitsinissaq suliaralu aallartillugu. Allannguuteqartitsinissaq Kalaallit Nunaanni oqartussaasut kajumissaarineratigut pivoq.

- Allannguuteqartitsiviusussat tassaapput najuisinnaanermut angajoqqaatullu oqartussaassuseqarnermut tunngasut kiisalu ataatassarsiuinermut tunngasut, tassalu taakkuullutik Kalaallit Nunaanni malittarisassanut atuuttunut naleqqiullugu Danmarkimi allanngoriartornerpaasimasut, taama oqarpoq Lars Thøgersen inatsisinik atortitsinermut ministereqarfiup ilaani ilaqutariinnut siunnersortit pisortaat. Allannguut soorlu aappariinnerup avataani meerartaartarsimasunut assorsuaq pingaaruteqartussaassaaq.

- Kalaallit Nunaanni eqqartuussiveqarfiit ataatassarsiuinermik pingaarnerusutigut aalajangiisartut, taava uagut Danmarkimi meeqqat aappariinnerup avataani inunngortartut ataatassarsiortarneranni inuit normuinik nalunaarsuisarfinnut, ilagiinni sognini ataasiakkaanut ingerlatinnissaat periarfissaraarput, taavalu inuit normuinik nalunaarsuisarfimmi inunngortut nalunaarsorneqaraangata, kina ataataanersoq isumaqatigiissutigineqartarluni tamatumunngalu peqatigitillugu isumaqatigiissutigineqartarluni meeraq ataatsimoortumik angajoqqaatut oqartussaassuseqarfigineqassasoq. Tamanna meeqqanut aappariinnerup avataani inunngortunut amerlanerpaanut iluaqutaasinnaavoq. Taamaattuminguna inatsit allanngortinniarneqartoq ataatassarsiuinerit amerlaqisut ataatassarsiuineruneq ajormata meeraq inunngoraangat ataatassarsiuineq nalunaarsorneqarsimanngikkaangat, taama Lars Thøgersen oqarpoq.

Meeqqat aappariinnerup avataani inunngortartut pillugit malittarisassat saniatigut avittarnerup angajoqqaatullu oqartussaassutsip allaffitsigut aqunneqarnera misissuilluarfigineqassaaq.

- Allassimasut tunngavigalugit avittarneq periarfissipparput, ullumikkummi Kalaallit Nunaanni imaammat eqqartuussivimmi imaluunniit Rigsombudimi isumaqatigiinniartoqartarluni, Danmarkimilu uagut ukiut marlussuit matuma siornatigut tamatuma allakkatigut pisalernissaa periarfissipparput, tassalu illuatungeriit tamatumunnga akuersisimagaangata. Akuersigaangata taava immersugassat immersorneqartarput Rigsombudsmandimullu nassiunneqarsinnaapput, tamatumalu inuiaqatigiinni Kalaallit Nunaanniittuni atulersinneqarnissaa orniginarluni.

Ilaqutariit inatsiseqartitaanerat ukiorpassuarni naleqqussarneqarsimanngimmat allannguuteqartitsinissaq suliassarujussuuvoq, taamaattumillu ukiut marluk qaangiuppata aatsaat allannguuteqartitsineq piariissalluni.

Kalaallit Nunaanni inatsit ima pisoqaatigilersimavoq tamanna qarasaasiami pigineqaraniluunniit, taamaattumillu innuttaasup nalinginnaasup inatsisinilluunniit atortitsinermut ministereqarfiup inatsisit atuuttut nassaariniarnerat ajornakusoortittarlugu. Allannguutissakkut pilersaarutigineqarpoq Kalaallit Nunaanni inatsisit tamarmik qarasaasiamut katersorneqassasut, taamaalillutik taakkua internettimi nassaariuminarnerussammata.