Ataatassarsiornissamut inatsisitigut illersugaannginnertik allanngortinniarpaat

Peqatigiiffiliornialersut naapeqqaarneranni arnat angutillu 28-t peqataapput 40-niit 81-inut ukiullit.

Najuuttut ilaata Emilie Olsenip naapinnertik pikkunanaarpaa.

- Inuuninni aatsaat taama pissanganartigisumik ornitaqarpunga. Nuannaartorujussuullungalu toqqissiallappunga, maaniinnaq Nuummi uersagaqatikka taama amerlatigisut naapissinnaagakkit, Emilie Olsen oqarpoq.

Assorsuaq aamma tulluusimaarutigaa suliniutit soqutiginartut arlallit nunatsinni aallartinneqalermata.

Najuuttunit paasiniagassaqqitsinneqartut ilagaat sooq Naalagaaffiit Peqatigiit inuit kikkulluunniit naligiissitaanissaannik maleruaqqusaa Danmarkip naalagaaffiata atsioqataaffigisimasani unioqqutillugu kalaallit uersakkat pisinnaatitaaffeqannginnissaannik inatsisiliorsimanersoq.

Emilie Olsenip angutaa qallunaajusoq nuliaqareerluni kalaallimik uersaannissimavoq. Inersimasunngornermini ujartuartarsimagaluarpaa, pisortalli ingerlataat aporfissaqartitsiuarsimapput.

- Ataataga kinaasoq naluara, ulloq manna tikillugu suli paasinikuunngilara. Ajoraluartumik ujaasinerpassuakka tamarmik kinguneqarnikuunngillat, oqarpoq.

Emilie Olsenip neriuutigaa ataatamik ujarlerniartut qallunaatut oqaatsinik piginnaasakitsut peqatigiiffittaarunik ikiorserneqartalerumaartut.

- Uanga qallunaatut pisinnaasakka annikissimammata ingerlariaqqissimanngilanga,

Unnummik naapiffiusumik aaqqissuisoq Tida Ravn oqarpoq, ukiorpassuarni nipangiussiinnarsimaneq maanna qaangiuttoq.

- Paasinarsivoq uersakkatut atukkat imaannanngitsorujussuusimasut. Ilanngui unatagaallutik ilanngui nittarsaanneqarlutik. Ilai immikkoortitaallutik, allanit nalikinnerusutut pineqarlutik. Tupannaqaaq uffa inunnik affaannaasoqanngitsoq, tamattami ilivitsuuvugut, tamattalu pisinnaatigaaffeqarluta, Tida Ravn oqarpoq.

Isumaqarpoq naalagaaffiup sumiginnaasimanera aaqqiivigineqartariaqartoq.

- Inatsisiliuunneqartariaqarpugut, uagut allatulli pisinnaatitaaffeqarpugut, ataataqarlutalu anaanaqarpugut, allatut inunngortoqarsinnaanngilaq, Tida Ravn nassuiaavoq.

Nuummi peqatigiiffiliornermut atatillugu inunnik pingasunik suligasuartussanik toqqaasoqarpoq, Stine Sørensen attavittut pingaarnertut toqqarneqarluni. Nuummi inatsisitigut ataataqanngitsut tullianik naapissapput februaarip 24-ani.

Katuami ippassaq ataatsimiinnermut tunngatillugu Qanorooq unnugu aamma ilanngutassiaqarumaarpoq.