Ataataqarani alliartorneq kamaqalissutaasarpoq

- Kalaallit Nunaat danskit angutit sanaartoriartorlutik sorsunnersuup kingulliup kingorna tikerarfigilermassuk malunnartorsuarmik inuianni ilaatigut kamassaqarnernik pilersitsivoq kamaqarnerlu ima kinguaariinni maggusimatigilersimasoq, allaat ullumikkut inuunitsinni malunniusimajuartualersimalluni, Conni Gregersen oqarpoq.

- Kamaqarnerit assigiinngisitaarput. Kalaallit ilaasa Danmarki inuiaallu danskit asissoraat ilaasa Danmarki naalagaaffittut ajoraat. Pissutissaqarluarpormi. Danmarkip naalagaaffiata inuiannik kalaallinik nunasiaatilissuartut tiguaasimanera pitsaasuinnarnik kinguneqarsimanngilaq. Illuatungeqarpoq inuup kinaassusianut sunniutilerujussuarmik, Conni Gregersen nassuiaavoq, nangillunilu:

- Imaassinnaavoq kalaallip arnap angutip qallunaajusup qimassimammani kamaakkaa. Taannalu kamak sinerissap ilarujussuani allanittaaq misigineqarsimammat inuiaqatigiinni sunniusimaqaaq. Qallunaat angutit "uersaannittarsimanerat" nalinginnaasutut isigineqalersimavoq, isumaqartoqalersimalluni qallunaat tamarmik taamaattuusut.

Inuiaqatigiinni aperisoqartariaqalerpoq, Arnamuna nukipparujussuit kamaqarnerminut atortakkani sumut allamut tutsinniassagai. Oqaluuseralugu inuiaqatigiinni naqisimannittuutikkunnaarlugu kivitsisunngortinniarli, Conni Gregersen kaammattuivoq.

Kamaqarnerujussuaq qaangerniaraanni pisimasut oqaluuseriuarnissaat, atuaganngortinnissaat filmiliarinissaallu pisariaqartoq, tarnip pissusaanik ilisimasalik aamma isumaqarpoq.

Nunatsinni sanaartuleruttornerup 1940-kkunnit 60-ikkut tungaannut "uersagaasut"kisimik kamaqanngillat. Ullutsinni aamma inuusuttoqarpoq kalaallimik anaanalinnik qallunaamillu ataatalinnik kinaassutsiminnik ujaasisunik, tamakkulu Conni Gregersenip katsorsartarpai.

- Inuusuttut naapittakkama ilaasa akutaanertik immaqalu kalaallisut oqalussinnaannginnertik kamaqassutigisarpaat. Qallunaanngorsaanerup nalaani kalaallisut oqalussinnaannginneq ajornartorsiutaasimanngilaq, taamanikkummi qallunaat oqaasii pingaarnertut isigineqarput. Maannali ajornartorsiutinngorsimavoq, akutaaneq kalaallisulluunniit oqalussinnaannginneq qinngasaarinermut nikassaanermullu tunngaviulersimapput.

Inuup kinaassutsimik ujarlersup ajornartorsiuteqarnerani apeqqutaalersoq tassaalerpoq, inuup qanoq ittuunissaa kiap aalajangissagamiuk. Tamattami qanorluunniit isikkoqaraluarutta oqaaseqaraluaruttaluunniit inooqataavugut, Conni Gregersen erseqqissaavoq.