Ataataqanngitsut taarsiiffigineqarnissaat statsministerip itigartippaa

Statsministerip Naalakkersuisullu siulittaasuata ippassaq ataatsimiinneranni pineqartoq oqallisigineqarpoq.

- Inatsisiliatsinni qulakkeernikuuarput, ataataasoq suli uumappat kinaanersoq paasiniarneqarsinnaassasoq kingornussinissamullu periarfissiisoqassasoq. Ataataasoq toqoreersimappat pigisallu agguaanneqareersimappata tamanna ajoraluartumik periarfissaqanngilaq. Taamatut inerniliineq pitsaasutut isigaarput suliassarlu tamaannga killeqarsoralutigu.

Tamannali Naalakkersuisut siulittaasuata Aleqa Hammondip isumaqatiginngilluinnarpaa.

- Pineqartoq inuiannut kalaallinut tunngaviusumik pingaarutilittut isigineqarpoq. Inuppassuit naapertuilluanngitsumik pineqarnikuupput. Naalagaaffeqatigiinnerup iluani tamanna akuerineqarsinnaanngilaq. Naalagaaffeqatigiinni innuttaasut tamarmik assigiinnik pisinnaatitaaffeqarput, eqqartorneqartut qanga pisimanerat apeqqutaatinnagu.

Taassuma innersuussutigaa, inuit ataataminnit kingornussinngitsoorsimasut taarsiiffigineqarnissaat pillugu Naalakkersuisut Danmarkimut saaffiginninnissaat Inatsisartut piumasarinikuunerat.

- Tamanna suli oqallisigaarput. Ataataqanngitsut ullumikkut inuusut ataqqinassusilimmik pissuseqarfigalugit suliassaq naammassineqartariaqarpoq.

Statsministerip oqarnerata akerlianik ataataqanngitsut pillugit inatsit suli akuersissutigineqanngilaq. Kalaallit Nunaat pillug ataatsimiititaliami siunnersuut suliarineqartussaavoq, taamaammallu taarsiiffigineqarnissaq pillug oqallinneq pissutigerpiarlugu inatsisip aalajangiiffigineqarnissaa kinguartinneqarnikuulluni. Siunnersuut pillugu ataatsimiititaliap isummersuutit februaarimi saqqummiuttussaavai, aasalerneranilu inatsisip aalajangiiffigineqarnissaa ilimagineqarluni.