Ataataqanngitsut peqatigiiffittaarput
Meeqqat katissimanngitsunit meerarineqartut, inatsisitigullu illersugaanngitsut Katuami ippassaq ataatsimiisinneqarmata inuit 28-t takkupput. ”Inatsisitigoortumik ataataqanngitsut” peqatigiiffiannik maanna pilersitsisoqarpoq.
januaarip 21-at 2010 11:32
Nunatsinni inuppassuaqarpoq ataataqanngitsunik, taakkulu inatsisitigut illersugaanatik inunngorsimapput. Taamaammat ajornartorsiutip isiginiarneqalernissaa siunertaralugu atuakkiortoq Anne Sofie Hardenberg aamma tusagassiortoq Tida Ravn Katuamut ippassaq ataatsimiigiaqqusipput.
Tamatumanilu ”inatsisitigut ataataqanngitsut” peqatigiiffiat pilersinneqassasoq aalajangiunneqarpoq.
Naalakkersuisut, Inatsisartut ataatsimiititaliaat, naalagaaffiup sinniisaa aamma Inuit Issittormiut Siunnersuisoqatigiiffiat ataatsimiittarnissani siunissami ingerlanneqartartussani aggersarneqartalernissaat aamma pilersaarutaasoq, Tida Ravnip ilisimatitsissutigaa.
