Ataataqanngitsut Paamiuni aamma aggersarneqarput
Paamiuni ’ataataqanngitsut’ aqagu nalunaaqutaq unnukkut arfineq-marlunut Tilioq-mut ataatsimiigiaqquneqarput. Taama Isak J. Thorsen, kinguaasiuutitigut atornerlugaasimasut peqatigiiffianni Kialaaq-mi aamma siulittaasuusoq nalunaaruteqarpoq.
Inuit inatsisitigoortumik ataataqanngitsut Nuummeersut peqatigiiffiliornissamut alloriarneq siulleq ippassaq iliuuserereeraallu tamanna pivoq, peqatigiiffiup nunatsinni katissimanani meerartaarineqarsimasut danskinillu ataataqartut, ataatassarsiuinernik ingerlatsisinnaanermut inatsisitigoortumik pisinnaatitaaffeqalernissaat aamma ataataminnit kingornussisinnaanermut piginnaatitaaffiisa atortunngortinniarnissaat sulissutiginiarpaa.
Tusagassiortoq Tida Ravn ataatsimiinnermut aqqutissiuussisuusoq, ataatsimeereernerup kingorna illoqarfinni allani innuttaasunut taama naammattuisimasunut, ataatsimiititsinernik aaqqissuusseqqusilluni kaammattuuteqarpoq.