Nannup saassussineranit ataataq meeqqaminut illersuitilluni toqusoq Canadami sapiitsuliornermut nersornaasiunneqartartumik anginerpaamik maanna nersornaaserneqarpoq.Assi: Frank Rønsholt/København Zoo

Ataataasoq meeqqaminut illersuitilluni toqusoq sapiitsuliortutut nersornaaserneqartoq

Nannup saassussineranit ataataq meeqqaminut illersuitilluni toqusoq Canadami sapiitsuliornermut nersornaasiunneqartartumik anginerpaamik maanna nersornaaserneqarpoq. CBC News taama allaaserisaqarpoq.

Aaron Gibbons meeqqanilu Nunavummi Arfiani 2018-imi juulimi mannissarput.

Arfiat Tasiusarsuup kimmut sineriaani illoqarfimmit Churchillimit 200 kilometerinik avannarpasitsigisumiippoq, sumiiffillu nanoqarfiulluartartutut ilisimaneqarpoq.

31-nik ukiullip Aaron Gibbonsip nanoq tassanngaannartumik imminut meeqqaminullu saassussisoq takugamiuk nannup meeqqamilu akornannut nallarpoq.

Ataataq ikilingaatsiarsimasoq sumiiffigisaminilu toqusimasoq ilisimannittut oqaluttuarput, taassumali meerai aniguillutik.

Aallaaniaq alla pisup kingornatigut sumiiffimmukarpoq nanorlu aallaallugu.

Arfiani innuttaasut Aaron Gibbonsillu ilaqutai Gibbons sapiitsuliorluni toqusoq tusagassiorfinnut oqaatigaat.

Aaron Gibbonsip toquneranit ukiup aappaa avillugu qaangiuttoq Canadami guvernør-generalip, Julie Payettep Canadami pisuni navianarluinnartuni sapiitsuliortunut nersornaasiunneqartartumik nersornaaserpaa.

Nersornaat The Star of Couragemik, kalaallisuunngorlugu Sapiitsuliornerup Ulloriaanik, taaneqartartumik Gibbonsip meeraanut Ottawami qaammatini aggersuni nalliuttorsiortumik tunniunneqarumaarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat