Ataasinngorpat aalajangiivigineqassaaq
Qaammammi kingullermi Nuup eqqartuussiviani aalajangiineq, Nunatta eqqartuussiviani ullumi suliareqqinneqarpoq, ullorlu naallugu saqqummiisoqarluni.
Unnerluussisut piumasaqaatitik tassa angutip 42-nik ukiullip ukiuni pingasuni aamma angutip 37-nik ukiullip ukiup aappaata affaani pineqaatissinneqarsimasunut inissiisarfimmiittussanngortinneqarnissaat aalajangiusimavaat. 37-nik ukiulik Nuummi eqqartuussivimmit pinngitsuusutut qaammammi kingullermi eqqartuunneqarpoq.
Unnerluutigineqartut unnuaq taanna 34-nik ukiulimmit arlaleriarlutik annersarneqareerlutik toqunneqarnissaminnillu sioorasaarneqareerlutik, sooq politiinut ikiortissarsiorlutik sianersimannginnerat, unnerluussisup ullumi saqqummiinermini apeqquserpaa.
34-nik ukiulik unnerluutigineqartup aappaata inaanut pingajussaa takkummat, 42-nik ukiulimmit aallaaneqarpoq, tamannalu toqqutigalugu.
Unnuaq taanna 34-nik ukiulik aggeqqissagaluarpat aallaaneqarnissaanik, unnerluutigineqartut isumaqatigiissimanersut, ullumi eqqartuussisoqarnerani nalornissutaalerpoq. 42-nik ukiullip aallaannittuunini nassuerutigaa, 37-nillu ukiullip toqumik kinguneqartumik nakuusersimasutut ilaasimanera nalornissutigineqalerluni.
Angutit marluk unnerluutigineqartut juulliaqqap ullaavanili tigummigallarneqarput. Ataasinngorpat ullup qeqqanut suliaq aalajangiiffigineqassaaq.
