Ataasiinnarmik saaffiginnittarfeqalernissaa sulissutigineqarpoq

Kalaallit Nunaanni Takornariaqarnermik Inuussutissarsiornermillu Siunnersuisoqatigiit GTE aamma inuussutissarsiutitigut aningaasaliisarfik GV inuussutissarsiutinik siuarsaanissamik siunnersuisarput.

Ataasiinnarmilli saaffiginnittarfeqalernissaa anguniarlugu Naalakkersuisunit maanna misissuisitsillutik Aleqa Hammond oqarpoq.

- Inuussutissarsiornermi siuarsaarusuttut saaffissaat, ikiorserneqarfissaat kiisalu siunnersorneqarfissaat ataasiinnaassaaq. Taamaaliornikkut inuussutissarsiornermik siuarsaaniartut oqilisaavigiinnarnagit aammali inuiaqatigiinni sukkanerusumik pilertornerusumillu ikiorsiisarnissaq anguneqassaaq.

Aleqa Hammond erseqqissaavoq, suliffeqarfinnik kattutsitsinissaq siunertarineqanngitsoq, eqaannerusumilli suleriaaseqartitsilernissaq siunertaasoq.

Atassutip Inatsisartuni ilaasortaatitai Naalakkersuisunut apeqquteqaateqarsimapput, Kalaallit Nunaanni Takornariaqarnermik Inuussutissarsiornermillu Siunnersuisoqatigiinni GTE-mi susoqarneranik paasiniaallutik.

Atassutip apeqquteqaataanni ilaatigut allassimavoq, suliffeqarfimmi tassani eqqissiviilliortoqarneranik takussutissaqartoq kiisalu takornariaqarnerup inuussutissarsiornerullu inerisarneqarnissaannut suleriaasissanik isumaqatigiinngittoqartoq, assersuutigaallu, GTE-mi sulisut siulersuisunilu ilaasortat pingaarutillit maajip qaammataani tunuartoqarsimanera, tamannalu ernumanartutut nalilerlugu. Tamatumunnga Aleqa Hammond ima oqarpoq:

- Eqqissiviilliornermik nipeqassappat ajuusaarnartorujussuuvoq, eqqissiviilliortoqarnissaali siunertarinngilarput. Suleqatigiissitap misissuisup takutikkumaarpaa, qanorpiaq aaqqiisoqassanersoq. Tamanna aasaq naariarpat takussavarput. Qularnanngilarli tamatta ajunngitsumik aaqqiissuteqarnissarput soqutigisarigipput. Aleqa Hammond nassuiaavoq.