Qulaarpaa Ataasiakkaanut pisassiisoqartalernissaa suliassaassaqisoq
Umiatsiaararsorluni qaleralinniarnermi tunineqarsinnaasunik ataasiakkaanut pisassiisoqartalertariaqarpoq, KNAPK isumaqarpoq.
Naalakkersuisoqarfiulli taakkartorpaa tamanna piffissamik annertuumik atuiffiussasoq. Kisiannili KNAPK piffissanngornerarpaa.
- Maanna pisassanut killilersuisarneq siunissamilu aqutaasumik aalisarnerup ingerlanneqarnerani saneqqunneqarsinnaanngilaq aalisagartassiissutit aalisartunut agguaatissallugit taamaalilluni ingerlaannarsinnaaqqullugu aamma sinerissap qanittuani aalisartut pilersuisinnaanerat, Henrik Sandgreen KNAPK-mi siulittaasoq oqarpoq.
Aamma atuaruk Killilersugaanngitsumik aalisarneq suli isorineqartoq
Petrus Biilmann, KNAPK
Kisitsisitsigaatsiassasoq
Umiatsiaararsorlutik qaleralinniat tunineqarsinnaasunik ataasiakkaanut pisassiissusiisalernissaq aalajangiunneqarpat, tamanna suliassaassaqisoq, aalisarnermut naalakkersuisoqarfimmi allaffimmi pisortap Emanuel Rosingip erseqqissarpaa .
Ilulissani, Uummannami Upernavimmilu qaleralinniarnermi akuersissutillit 900-1000-illu maanna akornanniittut taassuma nassuiarpaa. Pisassissusersuisoqassappallu, qaleralinniartut taakkua tamarmik sivikinnerpaamik ukiuni pingasuni tunisaasa amerlassussaat naatsorsoqqqaarneqassapput.
- Taava aalisartut ataasiakkat piffissami aalangersimasumi tunisaat kisissuagut, agguaqatigiisinnerat kisillugu pisassiissutissallu agguaanniarsaralugit. Tamakkuinnaalluunniit kisitsisitsigaatsiassapput, Emanuel Rosing oqarpoq.
Taava qinnuteqaatit ataasiakkaat tamaasa pillugit atorfilittat tusarniaassapput, pisassiissutinullu agguaanneqartunut ataasiakkaanut tamanut maalaaruteqarnissaq periarfissaassaalluni.
- Tassalu taama aalajangertoqassagaluarpat, tamakkua tamarmik suliaassaqaat, Emanuel Rosing oqarpoq.
Aamma atuaruk Aalisarnerup saniatigut periarfissat allat amigaatigineqarput
KNAPK nangaanngitsoq
Naalakkersuisoqarfillu assingusumik suliaqareeraluarpoq, tassa angallammik qaleralinnik aalisarneq eqqarsaatigalugu, tassani qinnuteqaatit 160-it suliarineqarlutik.
- Sulisut marluk-pingasut ukiut marluk sinnilaarlugit tamakkiisumik suliaqarsimapput, Emanuel Rosing oqarpoq.
Taamali suliaqarneq sulilussinnarnerussanngitsoq, KNAPK isumaqarpoq.
Isumallu taassuma pitsaasuuneranik umiarsiaararsorlutik aalisartut qularunnaarsinniarlugit, Naalakkersuisoqarfik SQAPK-lu ingerlatsiveqarfinnut angalaqatigiumavaat.
- Umiatsiaararsorlutik aalisartut aamma pisassinneqartalernissaat pisariaqartuusoq, angalanermi paasisitsiniutigissavarput.
Aamma atuaruk Inassutigineqartut aalisarnerup iluani malinneqanngillat
Aalisartut qanoq amerlatiginerinik kisitsisit. Najoqqutarisaq Aalisarnermut Naalakkersuisoqarfik .
