A.T.A. Tasiilaq tupaallatsitsivoq
Angutit isikkamik arsaallutik pissartanngorniutivinneranni A.T.A. Tasiilaq ukioq manna tupaallatsitsisuupput, marloriarlutik unammereernerminni semifinalimut anngutereermata.
Ippassaq Malamuk Uummannameersut unammivaat, Tasiilameersut pingasunik isertitsillutik ajugaasut, Uummannarmiut isertitsinngitsoorlutik ajorsartut.
Unamminerit siulliit ingerlanneqareerneranni pulje-t aappaanni holdit sorliit ingerlaqqissanersut suli nalunarallarpoq. Pissanganavissumik unamminerit kingulliit ullumi ingerlanneqassapput.
Pissartangorniutivinnerni aaqqissuisut, SAK Sisimiut, N-48 Ilulissat unammimmassuk tamarmik ataatsimik isertitaqarlutik naligiiginnarput.
K-33 Qaqortumeersut marloriarlutik unammereernerminni marloriarlutik ajorsarput, ingerlaqqinngitsoorlutillu.
N-85 Narsaq ingerlaqqinnissaminnik suli periarfissaqarpoq, sulili nalunarallarpoq.
Unamminerit kingulliit inerneri unnugu radioaviisimi tusarliukkumaarpagut, aqaguminngaanniillu KNR-TV-kkut arsaattut malinnaavigineqarsinnaalissapput.
