Asuli oqalunneq akisooq

Angut Norgemiu Københavnip timmisartoqarfissuani qaartartumeerinissaminik asuli oqalukkaluarluni misillertitaavoq. Asuli oqalunnermi kingorna angut tigusarineqarpoq eqqartuunneqarunilu parnaarussaasinnaalluni.
Allattoq Apollo Jeremiassen
februaarip 28-at 2011 14:30

Angutip Norgemiup aallariartorluni misissuisarfitsigoortilluni, nassataasa ilaat savik ukusartoq inerteqqutaasoq nassaarineqarpoq.

- Kamarujussuaqinagama taanna savik tiguinnarussiuk ajunnginneruvoq, angut 29-nik ukiulik sillimaniarnermut sulisunut oqarsimavoq.

Taamalu oqareerluni kaasarfimminik ammuppaa ikittaat, misissuisullu tungaanut miloriullugu.

- Aamma una tiguniarsiuk timmisartoq kukoqinavara, angut oqarpoq. Taama oqareerami aamma oqaruserpoq nassatamini qaartartoqartoq. Nassataasali misissoqqissaarneranni qaartartumik nassaartoqanngilaq.

Tamatuma kingorna sillimaniarnermi sulisut politiit qaaqquaat, angullu taakkununnga tunniullugu.

- Taama sakkortutigisumik sioorassarimmat unnerluutigissavarput, politiit paasiniaasartut pisortaat, Kenneth Vest oqarpoq.

Timmisartoqarfinni asuli sioorasaarisut oqartussanik tusaanngitsuusaarneqarneq ajorput. Assersuutigalugu arnaq utoqqasaaq 58-nik ukiulik, qanitukkut aallariartorluni oqarasuaat kaasarfimminit ammullugu nassataminut qinnguagassanut ilanngullugulu oqarpoq "Qaartartuuutiga una ilanngutiinarpara" misissuisunullu tunniullugu. Tamatuma kingorna arnaq taanna ulluni qulini ajortulioqqikkuni parnaarussaasussatut pillagaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq