Astrid Fleischer Rex siulittaasup tulliatut siullertut qinerneqarpoq

Ikaarsaariarnermi ataatsimiititaliami ilaasortat isumaqatigiillutik Astrid Fleischer Rex (D) siulittaasup tulliatut siullertut qinerpaat kingusinnerusukkullu kommunerujussuanngortussami, Kommuneqarfik Sermersuumi, borgmesterip tulliatut siullertut atuuttussanngorlugu Per Berthelsen-illu (S) sulinngiffeqarallarnissamik qinnuteqaataa akuersissutigalugu.
Allattoq Louise M. Kleemann
oktobarip 03-at 2008 12:38

Per Berthelsen (S) naalakkersuisunut ilaasortanngortinneqarnermi, kingornagut kommunerujussuanngortussami, Kommuneqarfik Sermersuumi, Ikaarsaariarnermi ataatsimiititaliami pisussaaffimminit sulinngiffeqarallarniarluni qinnuteqaateqarpoq.

Ikaarsaariarnermi ataatsimiititaliap qinnuteqaat akuersissutigaa ullumikkut tallimanngorneq oktobarip pingajuanni immikkut ittumik ataatsimiinnermini.

Taamaasilluni Astrid Fleischer Rex (D) Ikaarsaariarnermi ataatsimiititaliami ilaasortanit tamarmiusunit siulittaasup tulliatut siullertut qinerneqarpoq, kommunerujussuanngortussamilu borgmestareqatigiittussat januaarip aallaqqaataa 2009-p kingornagut ukunannga inuttaqalissapput, borgmesteri Asii Chemnitz Narup (IA), borgmesterip tullia siulleq Astrid Fleischer Rex (D)aamma borgmesterip tulliata aappaa Doris Jakobsen (S).

Kiisalu Ikaarsaariarnermi ataatsimiititaliap Mille Søvndahl Pedersen (IA) aningaasaqarnermut ataatsimiititaliami ilaasortanngorpoq Justus Hansen (D) sinniisussaralugu. Aningaasaqarnermut ataatsimiititaliami sinniisussanngortut nutaat aamma tassaapput Poul Hansen, Astrid Fleischer Rex-imut sinniisussanngortoq aammalu Adolf Holm (IA), Ove Karl Berthelsen-imut (IA) sinniisussanngortoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq