Assortuunnerit ingerlajuarsinnarput

Kingullermik tusarparput, kommunit kattuffiata, KANUKOKA-p, ernumanartoqartikkaa, Nunamut Namminermut Naalakkersuisup, Anthon Frederiksenip, aamma Isumaginninnermut Naalakkersuisup, Maliina Abelsenip, nalunaarutigimmassuk, meeqqanut inuusuttuaqqanullu, aammalu innarluutilinnut, ulloq naallugu paaqqinnittarfiit, Namminersorlutik Oqartussat suli akisussaaffigissagaat. Ulloq unnuarlu paaqqinnittarfiit kommuninit akisussaaffigineqalissasut aalajangiunneqareeraluarpoq.

KANUKOKA-mit erseqqissaatigineqarpoq, kommuninik aaqqissuusseqqinneq Namminersorlutik Oqartussat kommunillu ataatsimut suliassarigaluaraat. Aamma aalajangiunneqarsimagaluarpoq ingerlatsinermut sanaartugassanullu suliat kommuninit akisussaaffigineqalissasut, taamaaliornerlu sipaarutaassasoq kommuninik aaqqissuusseqqinnermi siunniussaagaluarluni.

Kommuneqarfik Sermersuup borgmesteriata, Asii Chemnitz Narupip, Inatsisartut Aningaasaqarnermut ataatsimiititaliaanut eqqaasitsissutigisaa, kommunit aaqqissuussaanerata isumaa ataqatigiissoq siunniunneqarsimasorlu puigoqqunagu, tamannalu KANUKOKA-mit isumaqataaffigineqarpoq.

- Ataqatigiissaarineq puigorneqarpat, kommunit aaqqissuussaanerata siunertaa sumiginnassaaq, kommunit kattuffiat nalunaarpoq.