Assit Obamap saqqummiunniagaralui saqqummiuteqquneqanngillat

Afghanistanimi Irakimilu amerikamiut sorsunnerni tigusanik parnaarussivissuini naalliutsitsisarsimagaaneranni assit 44-t uppernarsaatissatut præsident Obamap saqqummiunniagaralui USAp sakkutuuisa naalagarsuisa præsidentertik saqqummiussiniartoq unitsissimavaat.
maajip 14-at 2009 17:27

- Afghanistanimi Irakimilu sorsunnerni tigusat assingi 44-t USAmi eqqartuussisut qullersaasa saqqummersinnissaannut akuerisaat, præsident Obamap maanna saqqummersikkumajunnaarpai. Tamatumunnga peqqutaavoq sakkutuut naalagarsuisa, illersornissamullu ministerip, Bill Gatesip assit saqqummersinneqannginnissaannut toqqammavilersuutaat Obamap tusaaniarnerulermagit.

Kingunerissavaa eqqartuussisutigoorlugu kingorna suliareqqinneqarnissaa. Illuatungiliuttut Konservativit nuannapput præsident Obamap kukkunini nassuerutigimmagu, nassuiaaninilu allanngortimmagu.

Saamerliuniat, inuillu pisinnaatitaaffiisa eqqortinneqarnissaannik sorsuutiginnittut illuatungaagut pakatseqaat. Obama pasivaat George W. Buship nipaatsumik ingerlatsisimaneratut ingerlalersimanerarlugu.

USAmi inuinnaat pisinnatitaaffiinik sorsuutiginnittut American Civil Liberties Unionip siuttuata assit Guantanamomi tigusat naalliutsinneqarnerannit 44-t akornini sakkutuut ataasiakkaat naalliutsitsisarsimanerisut sakkortutigisut takuneqarsinnaasut.

Assillu ilaanni takuneqarsinnaanerarpai naalliutsitsinerit USAmi qulliunerpaaniit naalakkiutaasarsimaneri.

George W. Bush præsidentiutillugu qullersaasa naalliutsitsinissanut akuersisarsimanerisa suliarinera, eqqartuussisulersuunniarnerisalu Obamap tunuarterfigileruttorai oqallinneq naarallannertut ililluni aallarteqqippoq.