Assit milliardimik naleqarnerat qularineqalerpoq
Amerikamiu sanaartornermik sulialik Rick Norsigian nunarsuaq tamakkerlugu tusagassiutinik oqallisaangaatsiarpoq, taassuma ukiut qulit matuma siorna atornikuerniarfimmit karsi assit negatiiviinik imalik pisiani 45 dollarilerlugu pisiarisimasaa 1 milliardinik nalilerneqarmat.
Tamannalu eqqoqqissaarunanngitsoq pasitsaanneqarpoq.
Amerikamioq arnaq Marian Walton fjernsynimi isiginnaartilluni assit nuimmata akkagigaluami Earlimik atillip assilisai pingasut ilisarai saaffiginnillunilu.
Arnap akkaa assiliisartup tusaamasap Ansel Adamsip assiliiffigisimasaani assiliisimavoq.
- Eqqarsaatigiunnaarneq ajulerpara taanna karseq akkama pigisimassagaa, arnaq tv-qarfimmut oqaluttuarpoq.
Arnallu pineqartup pasittaassaqarnera aallaavigalugu assinik ilisimasallit misisuisut ataatsimik ilaneqarput.
Misissuinerlu suli naamassinngikkaluartoq misissuisut ilimagaat karseq akka Earlip pigisimassagaa, tusaamasap Ansel Adamsiunngitsoq.
Taamatullu naliliineq Norsigiannip eqqisseqqinnaarluni tiguaa, assit kopiivini tuniniaalluni niueruteqalereerami. Marian Waltonillu karsi akkaminut toqoreersumut pigititsinera illuatungilerlugu oqaaseqarfiginagu.
