Assit aalassassutaasut: Jim Lyngvild Ilulissani saqqummersitsinissaminut nangaalerpoq

Atisanik ilusilersuisartoq Jim Lyngvild puisip amiinik atisalianik assilisani pillugit kulturimik atornerluisutut isornartorsiorneqarpoq. - Kalaallit Nunaannut asanninnera aallaavigalugu suliaraakka, taanna oqarpoq.

“Ammip qalipaataa pillugu assigiinngisitsineq”, “Kalallit kulturiannik innarliineq”. "Atugarissaanerminik sanillersuussisinnaanngitsoq".

Assiliisartumut ilusilersuisartumullu Jim Lyngvildimut, taassumalu puisit amiinik ilusilersuilluni atisalinik assilisaanut, isornartorsiuisut inittartakkani inuit attaveqaqatigiittarfiini oqaatsit taakku ilaatigut atorpaat. 

Great Greenlandip Ilulissanilu katersugaasiviup qaaqqussutaani assitaliunneqarsimapput. Assilittartut nunatsinneersut puisip amianik ilusilersukkanik atisalerlutik asimi assilitissimasut takuneqarsinnaapput. Assilitittartut ilaat uumasunut eqqaanartumik isikkoqarput, soorlu immap killingani puisip amiinik atisallit.

Taamaaliornerli pissusissamisuunngitsoq, Klaudia Petersen isornartorsiuisut siuttuattut taaneqarsinnaasoq isumaqarpoq. Jim Lyngvildilu kalaallit pisataannik eqqumiitsuliornera pissusissamisoorsorinngilaa.

AAMMA ATUARUK Jim Lyngvild Great Greenlandip atisaliaanik nittarsaassivoq

- Asiit allamioq sinnerluta saqqummerpoq. "Uumasuutikka qaasuttut takusigit, pilersitakka takusigit. Uangana nuna piga uangaana kalaaliutikka". Uatsinnik piginnittutut pissuseqarluni takutitsivoq, Klaudia Petersen oqarpoq. 

Great Greenlandip Ilulissat Art Museumillu puisit amiinik nunatsinneersunik atuinermut, taamaalillunilu kulturikkut nittarsaassinermut, killiliisimasariaqartoq Klaudia Petersen isumaqarpoq. Taassumalu ilusilersuisartumik nunatsinneersumik atuisoqarnissaa iluarinerugaluarpaa. 

- Kulturerput tarnikkullu kinaassuserput asuli pisassaanngilaq, piumasaannarmik isummersorfissatut saqqummersitassaanngilaq, Klaudia Petersen oqarpoq. 

- Imanngilaq allamiunik killilersuiniartunga, ataqqinninnerunissaq killiliinissarlu ujartuinnarpakka. Taanna oqarpoq. 

Lyngvild: eqqumiitsuliorneq kiffaanngissusiuvoq

Isornartorsiuinerli sangutitsinerusoq, Jim Lyngvild isumaqarpoq. Taassuma nunatsinnut kultooritsinnullu asanninnini naqissuserpaa. Kikkulluunniillu kulturi eqqumiitsuliornerlu pillugit pinngorartitsisinnaanerat oqaatigalugu: 

- Kulturi eqqumiitsuliornerluunniit kikkunnit tamanit atorneqarsinnaavoq. Assiliigaangama eqqumiitsuliortarpunga, nammineq paasinninnera atorlugu nassuiaallunga, taanna KNR-imut oqarpoq.

Jim Lyngvildilli assiliilerami eqqarsarluarsimanerarpoq. Isumassarsiamini siullermi ilusilersuisartut dansiusup Peter Jensenip kamiliai aallaavigissallugit eqqarsarpoq. Peter Jensenip ilusilersugai 2009-mi London Fashion Weekimi takutinneqareermata ilusilersuisartoq arlaleriarluni kalaallinit toqutaanissamik siorasaarneqarpoq. 

Jim Lyngvildip kamiit atorniarunnaarlugit aalajangerpoq. Taava “unikkaaneersoq” Sassuma arnaa assilisaminik isumassarsiorfiginiarlugu aappaattut isummerpoq. “unikkaanillu” isumassarsiornnissaq aamma isumassarsiatsialaanngitsoq, arlallit isumaqarput.

Jim Lyngvildilu kaminnik taakkuninnga atuinnginnissaminut siunnersorneqarpoq. Eqqarsaat alla tassaasimavoq oqaluttuatoqqat soorlu "Sassuma arnaa"-ta assini atornissaa. Inuiaalli oqaluttuaatitoqaanik atuinissaq arlalinnit aamma innersuunneqanngilaq.

Pinngortitaq. puisip amia inuillu assimiinniissaat aalajangiutiinnarpaa. Tamannali Jim Lyngvildip tupaallaatigeqisaanik aamma isornartorsiorneqarpoq. 

 

 

- Inuit nakkarsarniaanarlugit eqqumiitsuliortutut kiffaanngisusera atorneq ajorpara. Siumut ingerlanisarivunga. Kisianni killilersoneqartutut misigisimaqaanga – toqqaannartumik killilersorneqartutut misigisimavunga, kulturimut asanninneq misiginngilara, taanna oqarpoq.

Kalaallilli isornartorsiuisut nuannarinnittunit ikinnerungaartut nittartakkakkut inuit attaveqaqatigiittarfiini "nipituuliortut" taassuma maluginiarpai. 

- Ikitsuaqqat immaqa qulit 15-illu missaanniittut kamaqalutillu killissaminnik qaangiivigineqartutut misigipput. Taakkuuppullu aamma Great Greenland LGBT-p qalipaataanik qalipaatilimmik taskiliormat kamattut, allallu pillugit aamma kamannikuupput.Taakkuuppullu aamma tamatigut piumasaminnik angusaqartartut, Jim Lyngvild oqarpoq. 

Tamannalu Jim Lyngvildip paasisinnanngilaa. Assit kulturikkut eriagisassamik aseruinngillat, eqqunngitsumik paasissutissiinngillat imaluunniit tillinnerunngillat - akerlianillu pisoqarpoq.  

AAMMA ATUARUK Tunisisut ikilinerat Great Greenlandimut ilungersuarnartorsiortitsisoq

- Kalaallit kulturiat ima nukittutigaaq, kulturimik taama nukittutigisumik aatsaat takuvunga. Assinilluunniit 10 millioninik saqqummersitsigaluaruma kalaallit kulturiat innarlernavianngilara, Jim Lyngvild oqarpoq.

Assinullu tunngatillugu kalaallit illersuisorpassuusut aamma taassuma maluginiarpaa. Soorlu Facebookimi quppernermi Nuummi Aperiinnariarimi:

- Wow! Kusanat. Eqqumiitsuliortutut kiffaanngissutsit nassuiartariqarnagulu utoqqatsissutigisariaqanngilat. Assut kusanaqaat isumassarsiorfissatsialaallutillu, atuisoq allappoq.

- Torrak, nutaaliorneq sapiitsuliornerlu. Ajunngilluinnarpoq, assit kusanarput, alla allappoq.

Taamaakkaluartoq Jim Lyngvildip, Ilulissani katersugaasivimmi marsip ulluisa 13-ianniit saqqummersitsinissani nangaassutigilerpaa.

- Pisoq "Jimmip Kalaallit Nunaannut akiuunneratut" imaluunniit "Jimmip tusagassiorfinni akiuunneratut" imaluunniit kulturikkut akiuunnertut isigineqassanngimmat. Asanninnermi aallaavigalugu pilersinneqarpoq, Jim Lyngvild naggasiivoq. 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl