Assilisittartuussagaanni inuttut qinngorneqartariaqarpoq!

Nunatsinni assilisittartunngorniaraanni qallikkut isikkoq kisimi apeqqutaaneq ajorpoq. Inuttulli qinngorneqassusaa assiliiviullu saani sulerusussusaa apeqqutaasarput. Nunatsinni assilitittarfimmi, Alfa Woman-imi, aallarniisut ilaat Per Lundblad-Pedersen oqarpoq:

- Nivissat qinngornerissaartut sapinngisamik assilisittartuutigerusuppagut. Inuttut qanorissusaat aamma pingaaruteqarluinnarpoq.

Nivissat isikkorissuinnaassanngillat aamma assiliiviup saavani assilittaqattaarneq sungiusimasariaqarpaat. Inuit ilanngui pinnersorujussuusinnaasarput ittuutuujullutilli. Uagutsinnut pingaarnerpaavoq nivissat assilitittarnissartik nuannarissagaat.

Per Lundblad-Pedersen aperaarput qassinik assilittartuuteqarnersut imalu akivoq:

- Nivissat 14-upput angullu ataasiulluni. Angutit assilisittartut assut amigaatigisarpavut taamaattumillu neriuutigaarput angutit amerlanerit assilisittartunngorusullutik uatsinnut saaffiginnittarnissaat.

Nunat tamalaat assilittartut pillugit malittarisassaataat sapinngisarput tamaat malinniartarpavut.

Inuit saluttuaqqat assilittartuutigissallugit soqutiginngilarput.

Per Lundblad-Pedersen aperaarput assilittartut nunatsinni suliassaqarluarnersut imalu akivoq:

- Siusinnerusukkut nivissat atisanik assigisaanillu tuniniaanermi taamaallaat assilineqartarput.

Massakkullu nivissat assilittartut amerliartorput. Assilisinnerullu kingorna akissartinneqarneq ajorsimapput ilaallu aningaasamininnguanik akilerneqartarsimallutik.

Assilisittartullu ilai oqarfigineqartarsimapput suliaminnut assilisissimanerat ilaaginnartoq. Taamaattumik suliassatta ilagissavaat akissarsiat aaqqivigineqarnissaat, Per Lundblad-Pedersen taama naggasiivoq.

Nuummi Alfa Woman-imik aallarniisut allat Per Lundblad-Pedersenip saniatigut tassapput angajua, Jakob Lundblad-Pedersen aamma Emil Abelsen.