Assiliisartut Taseralimmi saqqummersitsilersut
Tassa kiinaq aallaavigalugu assileeriaatsit pillugit saqqummersitsineq "Kiinnat" Taseralimmi aasaq manna ammarneqassaaq.
Saqqummersitsisut ilaat assiliinermik imaluunniit eqqumiitsuliornermik ilinniagaqarput ilaallu imminnut ilinniartissimallutik, Taseraliup Facebookikkut quppernerani tamanna atuarneqarsinnaavoq.
Assiliisartut Sisimiormiut tallimat assilisimasaat "Kiinnat"-mik taallugu saqqummersitsinermi takuniarneqarsinnaassapput.
Assiliisut tassaapput Steen Olsen, Arnajaraq Støvlbæk, Inuuteq Storch, Òlafur Rafnar Òlafsson kiisalu Dortheivalo L. Jensen.
Kulturikkut illorsuarmi aasaanerani saqqummersitsineq "Kiinnat" juunip ulluisa 16-ianni ammarneqassaaq, aggustillu ulluisa 14-iata tungaanut takuniarneqarsinnaassalluni.