Assiliisartorpassuit unammeqataapput

Assinik unammisitsinermi ”Nunaga”mi ajugaasoq Sisimiormiu Dorte Ivalo Jensen kunngissap Frederiup ullumi Arktisk Institutimi akissarsisippaa.

-Ukiarmi atualersut assuartut isiginnaartillugit assiliisorpassuit assigalugit asseq taanna assilisaraara. Assiliinermik nuannarisaqarpunga, imaanngikkaluarpoq kakkannerpaasunga, assiliinerli nuannareqaara, assinik unammisitsinermi ajugaasoq Sisimiormiu Dorte Ivalo Jensen, aatsaavissuaq unammisitsinernut peqataasoq oqaluttuarpoq.

Unammisitsinermi taaneqartumi “Nunaga”mi, assit 1.881-it nassiunneqarsimapput. Naliliisut ilaat aviisimi Politikenimi assiliisut pisortaata Per Folkvarip assit tamaasa isiginnaareerlugit qulanngivilluni ajugaasoq toqqarpaa.

Unamminermi assip allanit pitsaaqutigaa assilisittut qanilluinnartutut misinnarneri. Assilisaq takusanik allanut saatsitsisinnaasunik ilaqanngilaq. Inuttaasa kiinaat nuannerluinnarput. Atualeqqaartut sisamat; pingasut ittoorpalulaartut, sisamaallu nukappiaraq qitutsilluinnartoq torrallallugit assilisimavai.

Unammisitsinermi ajugaasoq Dorte Ivalo Jensen Danmarkimiinnini iluatsillugu akissarsiassani tiguaa, aqagulu nunatsinnut utissaaq sisimiormiuaqqat Tae Kwon-domik unammiartortut angalaqatigissallugit.