Nualluummik coronavirusimik tunillanneqarsimasut amerlanerpaartaat tunillanneqarnerminniit ullut tallimat arfineq-marlullu qaangiunneranni ersiuteqalertarput.Assi: KNR, Anton Gundersen Lihn

ASSILIARTAT: Coronavirusi timimi ima iliortarpoq

Coronavirusimik tunillanneqarsimagaanni timimi suut pisarpat? Tamanna allaaserisami uani akissutissarsiuk.

Coronavirusi tunillaakkaangat inuit ilaat allanit perulunnerusarput.

Tunillanneqarsimagaanni timimi qanorpiaruna pisoqartartoq?

Coronavirusersimasinnaanermik misissu-gassamik tigusiffigitinneq

Coronavirusimik tunillanneqarsimasorineqartoq vatpindi aalajangersimasoq atorlugu misissugassamik qarnganit anersaartuutaanilluunniit tigusiffigineqartarpoq.
 

Timi soorlu coronavirusimik tappiorannartoqaleraangat tamatumunnga ersiutaasut pinngorniaasaartarmata tunillanneqarsimaneq kingusissukkut paasineqartarpoq. Inuit ilaat ersiuteqalertannginnamik tunillanneqarsimanertik aaqqereeraangamik aatsaat paasisarpaat.

Tunillanneqarnermiit sapaatit akunnerata qaangiunnerani napparneq

Nualluummik coronavirusimik tunillanneqarsimasut amerlanerpaartaat tunillanneqarnerminniit ullut tallimat arfineq-marlullu akorngisa qaangiunneranni ersiuteqalertarput. Tamanna nappaatip tunillanneqarnermiit malunniunneranik taasarparpaat, tamannalu coronavirusimik tunillanneqarsimanermi ullut marluk aqqaneq-marlullu akornanni sivisussuseqarsinnaasarmat allanngorartarpoq.

Nualluut coronavirusi timimut tunillaannermiit malunniunissaanut siaruaatilertukkajuppoq.

Nualluutip coronavirusip tappiorannartuarai timip sananeqaataanik amerliartorfissaminnik ujarlertarput. Timi coronaviruseqaleqqunagu ajoqutaalersussanilluunniit tappiorannartoqaleqqunagu timip sananeqaataa taakkuninnga anngutsaaliuisartumik akiuussutissaqarpoq.

 

 

Nualluut coronavirusi nunarsuarmi tamarmi maanna tuniluutileruttortoq nappaataavoq nutaaq. Taamaammat taassuminnga tunillanneqarsinnaanngitsoqanngilaq, massa nualluummik nalinginnaasumik tunillanneqarsinnaanngitsoqartoq.

Timilu nualluummut coronavirusimut nutaajusumut tassa nappaammut COVID-19-imut akiuussutissaqanngingajavimmat inuppassuit taassuma tuniluutileruttornerani tunillanneqartarput.

Coronavirusip tappiorannartui timip akiuussutissaanit akiorneqarsinnaanngikkaangata timip sananeqaataanut annguttarput.

 

 

Coronavirusip tappiorannartuarai sananeqaammut anngukkaangamik sananeqaatip ilulianukartarput, namminerlu sananeqaatitik amerliartortittarlugit.

Coronavirusip tappiorannartuarai sananeqaammi taamaalillutik amerliartoruusaartarput.

 

 

Sananeqaat coronavirusip tappiorannartuaraanik ulikkaavikkaangat qaartarpoq, coronavirusillu tappiorannartuararpassui nutaat taamaalillutik timimut siaruaattarlutik.

Taakkua sananeqaatinut allanut amerliartorfigeqqitassaminnut ingerlaqqittarput.

 

 

Coronavirusi timimut sapaatit akunnerata qaangiutipajaarnerani siaruaatereeraangat, ersiutaasut malunniuttarput.

Tunillanneqarsimasut amerlanerpaartaat sakkukitsunik ersiuteqartarput, soorlu 38 gradit sinnerlugit kissarneqalersarput, quersukulalersarput toqqusaalluunniit ippigusuutigilersarlugit. 

Coronavirusimut maanna nakorsaateqaranilu akiuussutissaqanngilaq.

Nakorsaatit bakterianut toqoraatit, soorlu penicillinit virusimik nappaatilinnut nalinginnaasumik sunniuteqartanngillat. Taamaammat coronavirusimut aamma sunniuteqartanngillat, soorlu nualluummut nalinginnaasumut aamma sunniuteqartanngitsut.

 

 

Timip akiuussutissaa tunillanneqarnaveersaaqqissaarnerluunniit coronavirusimut maanna akiuussutissatuaagallarput.

Taamaammat assaat errortukulaneqassapput, talermut tangajortoqarlunilu quersortoqartassaaq, inunnut qanillattortoqassanngilaq oqartussaasullu inassutaat malinneqassallutik.

Inuilli taamaaliorsimagaluarlutik tunillanneqarsimasut amerlanerpaartaat nualluummut tassunga qujanartumik akiuussutissaqarluarput. Maannamut paasisat naapertorlugit ullut sisamat arfinillillu akornanni sivisussusilimmik aatsaat ersiuteqareeraanni timip akiuussutissaata coronavirusi nungutittarpaa.

 

 

Inuilli ilaat, soorlu utoqqaat napparsimareersulluunniit, nualluummut tassunga akiuussutissaqarpiartanngillat. Taakkua sakkortuunik ersiuteqarlersinnaapput, soorlu puallulerlutik, anernikilliorlutik allaallumi timip atortuisigut ajoquteqalerlutillu toqqutigisinnaavaat.

Peruluttut nappaat taanna sapaatit akunnerpanni angorniapiloorsinnaasarpaat.

Perululersimagaanni napparsimmavimmut uninnissaq pisariaqalersinnaasarpoq. Nappaammullu tassunga nakorsaateqanngikkaluartoq katsorsartittoqarsinnaanngikkaluartorlu ersiutaasut peqqissaavinni sakkukkillineqarsinnaapput.

Tamanna iltilersorneqarnikkut, tarajulersortinnikkut anersaartuuteqartitaanikkulluunniit pisarpoq.

Oqartussaasut inuppassuit ataatsikkut tunillanneqarnissaat ingalakkusukkaat

Perulullutik uninngasunik, ingammik sanngiitsunik napparsimasunillu annersaartuuteqartitaasariaqartunik katsoorsaaneq peqqinnissaqarfiup sullissineranik killiliisuuvoq. Tunillanneqarsimasut amerlavallaarpata taakkualu sakkortuunik ataatsikkut ersiuteqaleraluarpata peqqinnissaqarfimmi inissaalatsisoqalerlunilu sulisussaaleqisoqalissaaq.

Taamaammat oqartussaasut ilaatigut killilersuisorujussuanngorlutillu suliniuterpassuaqalerput. Qanorluunniit iliortoqaraluarpat qularnanngitsumik amerlasuut tunillanneqartussaammata peqqinnissaqarfik malinnaasinnaaqqullugu inuppassuit ataatsikkut tunillanneqarnissaat ingalassimasariaqarpoq.

 

Inuppassuit perulorratilissagaluarpata peqqinnissaqarfik inissaalatsilerlunilu malinnaasinnaajunnaassaaq. Ajornerpaappallu napparsimasut nakorsarneqartariaqartut napparsimmavimmut iseqqusaanaviarnatik.

 

Nualluummut coronavirusimut nunarsuarmi nunani assigiinngitsorpassuarni akiuussutissaliortoqarniarsarileruttorpoq, akiuussutissarli aatsaat 2021-imi atorneqarsinnaalissangatinneqarluni.

Tunillanneqarsimasoriguit najukkanni peqqissaavimmut sianerlutit saaffiginnissaatit, tassanilu qanoq iliortoqassanersoq aalajangerneqassaaq.

 

 

Isummersuutit