Assigiinngisitaarnerup ammasumik eqqartorneqarnera
Suiaaqqatinnoortaruma ajortuliussaanga? Tamannamita ilaquttamma kammalaatimmalu qanoq tugussavaat? Allat uattut nalaataqarsimasut qanoq iliornikuuppat?
Tamakkuupput assigiinngissitaarneq qulequtaralugu Katuami aqagu sisamanngornermi unnukkut oqallisissat ilaat.
Global Dignity Kalaallit Nunaat assigiinngisitaarneq, suiaaqqatiminoorneq aammalu kinguaasiutitugut peqqissuunnissaq pillugit oqallitsitsinermi qitiutinneqassapput.
- Inuiaqatigiit akornanni inooqataannissarput kajumernartuunissaa uagut sulissutigigatsigu, Aili Liimakka Laue peqatigiiffimmi siulittaasup tullia taama oqarpoq.
Taakku inuusuttunut paasititsiniaarusupput, eqqartueqateqarnissamullu saaffissaaleqisut aamma ikiorusuppaat aqutissiullugillu.
- Tamatta inissaqartariaqaratta, qanorluunniit ikkaluarutta allaannerugutta ajattugaanata immikkoortitaannatalu ernumassuteqarnata kinaasuserput atorlutigu naleqarluta naleqartinneqarlutalu, Aili Liimakka Laue oqarpoq.
Nammineq kajumissutsimik suliaqartartut kattuffiat Global Dignity, nunat assigiinngitsut 70-it angullugit sinniisuutitaqarput. Meeqqat inuusuttullu akornanni imminut ataqqeqatigiinnermik suliniuteqartuullutik.
