Assigiimmik akileraarusiisalernissaq naalakkersuisut siunniuppaat
Tassami Naalakkersuisunit maanna sulissutigineqalerpoq, kommunit sisamaasut assigiinngitsunik akileraarusiisarnerisa atorunnaarsinneqarnissaa, taarsiullugulu siunniullugu kommunit tamarmik assigiimmik nunamut tamarmut akileraartalernissaat.
Taamaaliortoqartalernissaanik innersuussinerit Siumumit isumaqatigineqanngillat.
Kommunit namminneerlutik akileraarusiisarnerisa atorunnaarsinnissaat Akileraartarnermut Atugarissaarnermullu Isumalioqatigiissitamit innersuussutigineqarpoq, tamannalu malinniarlugu Naalakkersuisut maanna siunniussipput.
Qaasuitsup Kommunia aamma Kommune Kujalleq ullumikkut 28 procentimik innuttaminnut akileraarusiisartut Kommuneqarfik Sermersuumi aamma Qeqqata Kommuneani innuttat 25 procentiiginnartarput.
- Aaqqiissut qanoq ittuussanersoq maanna akissutissaqartinngilarput. Nunamili sumiiffinni assigiinngitsuni assigiinngitsumik aaqqissuussisoqarsimanera qanoq iliuuseqarfiginiarparput. Naalakkersuisooqatigiinnilu siunniussaraarput inuiaqatigiit akornanni assigiimmik atugassaqartitaasoqarnissaa. Kommunit akornanni akileraarutip assigiinngissusaa 3 procentiuppat, taava innuttaasunut atugassarititaasut aamma soorunami assigiinngitsuussapput. Taamaattoqarneralu Naalakkersuisunit ernumanartoqartipparput. Tassalu equgassut tamanna kikkunnut tamanut eqqarsaatigeqqusarput. Akileraartarnermut Atugarissaarnermullu Isumalioqatigiissitap innersuussutai Inatsisartuni sisamanngormat oqallisiginereernerisa kingorna, Aningaasaqarnermut Naalakkersuisoq, Maliina Abelsen taama oqarpoq.
Kommunit namminneerlutik aalajangiisinnaatitaanerisa killilersorneqalernissaat mianersuuttariaqartoq Siumumit oqaatigineqarpoq:
- Kommunit kattutsinneqarnerat kommunit piginnaatitaaffiisa annertusarneqarnissaanik siunertaqartoq, qeqqaniit aqutsiartuaarnermit illuatungilissallugu mianersuuttariaqartoq Siumumiit isumaqarpugut. Atugarissaarnermi angujartuaarneqassappat taava tamanna piginnaatitaaffiiaanikkut anguneqarsinnaanngitsoq Siumumit isumaqaratta. Inatsisartuni sisamanngormat oqallinnermi Siumup oqaaseqartua, Jens Immanuelsen taama oqarpoq.
Kommunit assigiimmik akileraartalernissaannut siunnersuutip kommunini innuttaasunut assigiimmik atugassaqartitsilernavianngimmat, Naalakkersuisunit siunniunneqarpoq, tamanna pillugu kommunit isumasiorneqassasut.
Akileraartarnermut Atugarissaarnermullu Isumalioqatigiissitap innersuussutaasa ilagiinnarpaa, kommunit assigiimmik akileraartalernissaannik innersuussineq, tassalu ilaatigut taannaavoq Naalakkersuisut aappaagumiit suliniutigalugu aallartitassaat.
