Assigiimmik akeqartitsineq taamaatippat sulisartut eqqugaassanerarpai

Assigiimmik akeqartitsinerup taamaatitikkiartuaarneranut atatillugu sulisartut assut eqqugaassasut, SIK-p siulittaasua isumaqarpoq. Naalakkersuisut Siulittaasuata Hans Enoksenip ukiortaami oqalugiaataanut atatillugu Jess G. Berthelsen isummersornermini oqarpoq naalakkersuisut erseqqinnerusumik suleriaaseqartariaqartut.

-Massakkut nalunngilarput assigiimmik akeqartussaatitaanerup taamaatinneqarnerata kingunerisaaninngaanniit ukioq nutaamit aallartittumik kallerup innera aamma imeq nunaqarfimmi aamma illoqarfinni amerlanerni qaffattussaasoq, taamaasillunilu ilaasortatta soorunami aningaasarsiaasa pisussutigineqarsinnaanerat eqqorneqartussaavoq. Jess G. Berthelsen aallartippoq.

Arlaatigullu qanoq iliortoqartarsoraa.

- Isumaqarpunga assigiimmik akeqartussaatitaanerup taamaatinneqarnera eqqarsaatigeqqittariaqartoq, nutaamik aaqqissuisoqarnianngippat imaluunniit ersarivissumik oqariartortoqarnianngippat isumaqartoqassaaq: Siunertaraa illoqarfinnut noorarnissaq.

- Ilaasortagut eqqugaasussat eqqarsaatigalugit imaluunniit illoqarfinnut anginerusunut nooralertoqarsinnaanera sillimaffiginiarlugu arlaatigut aaqqissuisoqartariaqarpoq, nangippoq.

Qularinngilaalu ilaasortamik ilaasa assigiimmik akeqartussaatitaanerup taamaatinneqarnerata kingunerisaanik aningaasarsiamik pisissutigineqarsinnaanerat annertusaaffiginiarlugu, illoqarfinnut angunerusunut nooralersinnaanerat.

Jess G. Berthelsen taama oqarpoq.