Assartuussinermut akit qaffaavigineqartussanngorput

Tamannali suli aalajangiiffigineqanngilaq, Atassummeersulli Gerhardt Petersenip Knud Kristensenillu tamannarpiaq ernumassutigalugu parteeqatiminnut Steen Lyngemut peqqissutsimut attaveqarnermullu naalakkersuisumut saaffiginnissuteqarsimapput.

Royal Arctic Linep akigititanik qanoq annertutigisumik qaffaanissaminik takorluugaqarnersoq aammalu tamanna Naalakkersuisunit akuerineqassanersut paaserusuppaat. Inatsisartunullu ilaasortat taakku marluk maanna akineqarput.

Royal Arctic Linep akigititat procentinik qulinik qaffaavigineqarnissaannik siunnersuuteqarpoq. Qaffaanissarlu februaarip aallaqqaataanit atuutilerseqqullugu. Ukiuni tallimani siullerpaamik qaffaanerussasoq Steen Lyngep parteeqatiminut akissutimini aamma ilanngullugu oqaatigaa.

- Minnerpaaffilikkamilli assartuussinermut akigitinneqartut, inuinnarnit annikitsumik nassiussinermi atorneqartartut qaffaaviogineqassanngillat. Taakkumi Royal Arctic Linep naatsorsuutaasa tamarmiusut ilaminiinnaraat, Steen Lynge taama allappoq.

- Minnerpaaffilikkamilli assartuussinermut akigitinneqartut Nunatsinni innuttaasunut ataasiakkaanut pingaaruteqartupilussuupput, naalakkersuisoq aamma allappoq.

Royal Arctic Line ukiup affaanut naatsorsuutiminik ukiaq saqqummiussinerminut atatillugu assartuussinermut akigititanik qaffaasariaqartoqarsinnaanera nalunaarutigaa.

Tamannalu nunanit allanit eqqussukkavut pissutigalugit Nunatsinnut annertuumik eqqueratarsinnaavoq.