Assartuiviup pisortaa peersippaat

KNI-p umiarsuaatileqatigiiffiata assartuiviup pisortaa Søren Bjerregaard Jensen ukiup affaa pisortatut sulereersoq tunuartinneqarpoq. Ukiup affaani kingullermi KNI-p aningaasaqarnera ajorluinnartumik ingerlasimavoq, 75 mio. koruuninillu amigartooruteqarsimalluni.

Pisortaq tunuartinneqartoq katillugit ukiut 29-t atorfeqarsimavoq siullermik KGH-qarallarmat kingornalu KNI-mi.

Tamannalu pillugu Pilersuisup pisortaa Gerhardt Petersen ima oqarpoq.

- Ukiup affaata ingerlanerani Assartuivimmut tunngatillugu naatsorsuutit kusanarpallaarsimanngillat, tamanna pillugu paaseqatigiilluta tassani pisortaasoq tunuartariaqarsimavoq, Gerhard Petersen oqarpoq.

Ukiup affaata matuma siorna Assartuivik aallartinneqarpoq, tassungalu Søren Bjerregaard Jensen pisortatut atorfinitsinneqarluni.

Gerhard Petersen aperaarput qaatsiartaatitaaraluarnermut iluatsinngitsumut pisortaq pisuutitaasimanersoq.

- Pisuussut tamarmi tassaniinngilaq aap, qaatsiartaat aamma pisooqataavoq, akivoq.

Gerhard Petersen erseqqissaavoq sulisunut allanut tunngatillugu soraarsitsinissamik eqqarsaateqaratik.

- Naleqqusaasoqartussaavoq, naleqqusaasoqalerpallu eqquisoqarataannaavoq, taama oqarpoq KNI-mi pisortaq Gerhardt Petersen.

Assartuivimmi pisortanngorlaaq Frederik Olsen 49-nik ukioqarpoq. Siusinnerusukkullu aamma KNAPK-mi atorfeqarsimalluni.