KNI A/S-ip iluani aningaasanik amigartoorfiusimasut ilaat Royal Arctic Line A/S-imit akisussaaffigineqalissaaq, tassa nunaqarfinnik pilersuisartoq Assartuivik A/S Royal Arctic Line-imit aqunneqartussanngormat.
Isumaqatigiissut ippassaq inissippoq, Royal Arctic Line-imilu pisortaaneq Jens Andersen pilersaarutit ima nassuiaateqarfigai:
- Qanoq iliornikkut suliassaq naammassineqarsinnaanersoq paaserusupparput. Tamanna pissutigalugu iliuuserineqarsinnaasut suunersut paaserusuppagut, imminullu akilersinnaassanersoq paaserusullutigu, Jens Andersen oqarpoq, nangillunilu:
- Ukioq ataasiunngilarluunniit suliaq uagutsinnit KNI A/S-imut tunniunneqarmat, taamaammat suliassap suunera ilisimariikannereerparput, misilittakkavullu tunngavigalugit misissuiumaarpugut, Royal Arctic Line-ip pisortaanera Jens Andersen oqarpoq.
Assartuinermik suliassat imaatigullu inunnik angallassinissamik Namminersornerullutik Oqartussat tungaaninngaanniit suliarinneqqusisoqarsimanersoq aperigatsinni, Jens Andersen ima akivoq:
- Naagga, suliarinneqqusisoqarsimanngilaq. Namminersornerullutik Oqartussat oqaloqatigaagut, assartuisinnaanissamillu periarfissaqarnersugut Namminersornerullutik Oqartussanit ujartorneqarsimavoq, assartuinermillu misilittagaqarpugut, Jens Andersen erseqqissaavoq.
Assartuiviup Royal Arctic Line-imut nuunneqarnissaa pillugu KNI-p qullersaannit annertunerusumik paasissutisssarsiniaraluaratta iluatsinngilarput.