Assartuinermi akit qaffassanersut Naalakkersuisut aalajangiiffigingajalerpaat

Peqqissutsimut Attaveqarnermullu Naalakkersuisoqarfiup pisortaa, Ann Birkekær Kjeldsen, taama oqarpoq:

- Assartuinermi akit 10 procentimik qaffanneqarpata, tamanna Nunatsinni inuppassuarnut isumaqartussaammat, periarfissat assigiinngitsut misissortariaqarpagut. Suliarlu tamanna naammasseqqajaavarput, uangalu siunnersuummik Naalakkersuisunut majuusseqqajaavunga, Naalakkersuisullu sapaatip-akunnerata tulliani aalajangissapput, Peqqissutsimut Attaveqarnermullu Naalakkersuisoqarfimmi pisortaq, Ann Birkekær Kjeldsen oqarpoq.

Royal Arctic Line-ip assartuinermi akinik 10 procentinik qaffaasinnaanissamut qinnuteqaataa assigiinngitsunit isornartorsiorneqarpoq.
Pisiffik A/S aamma Kalaallit Nunaanni Brugseni taakkununnga ilaapput. Taakku ataatsimoorlutik ukioq manna januaarip 23-ani tusagassiuutinut nalunaaruteqarput, assartuinermi akinik qaffaasinnaanissaq apeqquserlugu.

Akinik qaffaasoqassappat atuisunut eqquisinnaasoq, taakku oqariartuutigaat, tassami assartuinermi akit qaffanneqassappata, nioqqutissat akii qaffattariaqassammata.

Tamannali eqqarsaatigineqarsimasoq, Naalakkersuisoqarfiup pisortaata oqaatigaa:

- Sunik periarfissaqarnersoq, allaanerusumik aaqqissoqarsinnaanersoq, akornutaasinnaasut qanorlu pisoqarsinnaanera misissoqqissaartariaqarsimavagut, aammali misissortariaqarsimavarput, inuiaqatigiinnut suna sunniuteqarnerlunnginnerpaasinaanersoq, Ann Birkekær Kjeldsen oqarpoq.

Aaqqiissutissatulli suut siunnersuutigineqarsimanersut, Naalakkersuisoqarfiup pisortaata oqaasearfigerusunngilai:

- Aaqqiissutissanik qanoq ittunik siunnersuuteqarnerluta oqaaseqarusunngilanga. Kisianni soorunami soqutigisat assigiinngitsut tusaaniassagaanni, taava tamanut annernannginnerpasumik napeqatigiiffissarsiortariaqarpoq imaluunnit ikinnerpaanut kinguneqartussaasumik. Tamakkualu saqqummersinniarlugit sulisimavugut, Naalakkersuisoqarfimmi pisortaq, Ann Birkekær Kjeldsen oqarpoq.