Inuussutissarsiutitigut iliniagaqartut arlalipparujussuit ulluni makkunani ilinnikaminnik naammassinnipput allagartartaarlutillu. Ilinniarfissuarmi ilinniartitsisutut naammassisut 27-it ullup qeqqata siorna allagartartaarput, Niivermik ilinniarfimmi tunngaviusumik ilinniartut aamma 27-it ullumi allagartartaassaapput. Nuummi Saviminilerinermut ilinniarfimmi Biililerisutut, assartugalerisutut motoorilerisutullu ilinniartut katillutik 35-it allagartartaarput. Siullerpaamillu arnamik umiarsualivinni assartugalerisutut ilinniartumik allagartartaartoqarpoq,
Marie Qujaukitsoq Qaanaaminngaaneersoq, Assartugalerisutut ilinniartuunissani toqqarsimavaa, nunarsuarmi tamarmi suliffigineqarsinnaasumik ilinniagaqalerusukkami. Ullumi Saviminilerinermik ilinniarfimmi allagartartaartoqarnerani angutit 35-it akornanni arnartartuaalluni ilinniarnerminik naammassiiluni allagartartaarpoq. Decemberip qaammataata tungaanut Nuup umiarsualiaviani Marie Qujaukitsup ilinniarnermi kingullersaa suliitigaluni ingerlatissavaa, ”nukersulaarluni sulineq nuannarivara, soorunalimi ilaannikkut qasunalaartarpoq” Marie Qujaukitsoq oqarpoq.
Anguterpaat 34 –it akornanni arnartatuaalluni Saviminilerinermut Ilinniarfimmi Assartugalerisut umiarsualivinni sulisussatut Marie Qujaikitsoq allagartartaarpoq.
Nuummi sulisistisut peqatigiiffiat Nuuk Arbedjsgiverforning, Saviminilerinermut Ilinniarfimmi ilinniakkaminnik naammassinnittut pingasut qiimmassaatissaannik tunivai.
Kim Junge Jørgensen, biililerisutut allagartartaartoq, 4.000,00 koruuninik akissarsivoq, ilinniartuulluarnerpaatut, agguaqatigiissillugu karakter-iginnerpaatut qiimmassaasigaalluni.
Mikael Andersen Assartugalerisutut allagartartaartoq,
Ilinniarnermini atuariartortuaannarnini pillugu , tassamigooq ukiuni pingasuni ilinniartuunermi katillugit akunnerit arfineq pingasuinnaat atuariartunngitsoorsimmammat, iliniakkaminullu pikkorimmat, sulisitsisut peqatigiiffiannit 2.000,00 koruuninik akissarsisinneqarpoq.
Ikinngutikkuminarnerpaatut akissarsisinneqarpoq, Marie Qujaukitsoq, Qaanaaq, suliakkiunneqartunut tunniusimanera, suliaminullu paasinnilluartuunera, ikiuukkumatuunera, ikinngutaalluartuuneralu pillugu, 2.000,00 koruuninik Nuummi sulisitsisut peqatigiiffiannit akissarsinneqarpoq.
