Assange ajugaagaluartoq nersorneqanngilaq
Julian Assange, Wikileaksimik pilersitsisoq 400.000-it missaannik taaneqarnerulluni ajugaagaluarpoq.
Kina ajugaassanersoq paasiniarlugu atuagassiamik atuartartut 3 millionit taasisinneqarsimapput, atuagassialli atuartartumi toqqagaat ajugaatinnagu namminneq toqqagartik salliutissimavaat. Business.dk taama allappoq.
Timesimik aaqqissuisuuneq Rick Stengel Adweek.com-imut nassuerpoq Julian Assange taaneqarnerpaasimasoq.
- Taamalli aalajangerninnut tunngaviuvoq ukioq kingulleq kina inuit inuunerannik sunniinnerpaasimanersoq eqqarsaatigigakku, Rick Stengel oqarpoq. Wikileaksilu oqaluttuarisaanermi eqqaaneqartassannginnerarlugu.
Time Magazinelli Assange ilaanngitsoortivissinnaasimanngilaa. Pingajuattummi inississimavaat, amerikamiut politikkikkut partiiat, The Tea Party, aappaattut inissilluni.
Aaqqissuisuunerup naalagaaniartutut pissuseqarnini illersorlugu oqaatigaa inuk ukiut hunnorujukkaani malunnaateqarnerpaaq, Albert Einstein, 1999-imi taasisitsinermi aamma taaneqarnerpaasimanngitsoq. Taamani Tyrkiap nutaaliap pilersitsisua, Mustafa Kemal Atatürk taaneqarnerpaasimagaluarpoq.
