Assance-mik illersuisut nukillalaartitsipput
Unioqqutitsillutik allat qarasaasiaannut pulasartut, nittartakkap WikiLeaksip pisortaanik Julian Assance-imik, pinngitsaaliilluni arnerisimasutut pasineqartumik, tapersersuisut, Sverigemi unnerluussisussaatitaasut nittartagaanni nukillalaartitsipput.
Sverigemi unnerluussisussaatitaasut nittartagaat allat qarasaasiaannut unioqqutitsillutik pulasartunit iserfigineqarsimalluni ippassaq unnukkut atorsinnaajunnaarpoq. Nittartagaq ullaaralaaq iserfigineqarsinnaanngeriarluni maanna iluarsivoq.
Sverigemi tusagassiorfinni oqaatigineqartut naapertorlugit allat qaraasiaannut pulasartut uani pineqartut tassaapput nittartakkap WikiLeaksip pisortaanik, Julian Assance-imik, tapersersuisut.
Nalunaarsuutinut IT-mullu pinerluttuliortartunut paasisimasaqarluartoq, suliffeqarfimmit PandaLabsimeersoq, Sean-Paul Correll, nutaarsiassaqartitsivimmut AFP-mut oqarpoq, unnerluussisussaatitaasut nittartagaannik ajoqusersuisut tassaasut Anonymousimik taaguutillit.
Ilisimatuup oqarnera naapertorlugu pc-it 500-it missaanniittut atorneqarsimapput.
Anonymosikkut, Assance-imik tapersersuinissaminnik siunertallit, paasisimannilluartut oqarnerat naapertorlugu, nittartakkap allap, akiliinissamut atorneqartartup, PayPalip, WikiLeaksip aningaasanik ingerlatitseqqittarneranut atorneqartartup, taavalu Schweizimi aningaaseriviit ilaata, Assance-ip kontoi matusimavai.
Nittartakkat taakku marluk assut ajornartorsiorsimapput, allallu qaraasiaannut unioqqutitsillutik pulasartunit nalunaaquttap akunnerpassuini akornusersorneqarsimallutik.
